واحدة من اهم الطُرق اللى ممكن توفّر بيها فلوس اثناء سفرك هى انك تأجر عربية، وده لأن فيه بلاد كتيرة بتبقى المواصلات فيها غالية وإيجار العربيات رخيص، غير انك طبعًا لو معاك عربية ده هيساعدك تلف اماكن اكتر وابعد وتستغل وقت سفريّتك الاستغلال الامثل.
وعشان تأجر عربية برّا مصر لازم يبقى معاك حاجة اسمها رخصة قيادة دولية، وده لأن رخصة القيادة المصرية ديه مش مُعترف بيها برّا مصر، اما رخصة القيادة الدولية ف ديه مُعترف بيها فى اى بلد فى العالم.
طيب ازاى تقدّم على رخصة القيادة الدولية، وإيه الاوراق المطلوبة للتقديم، واستلام الرخصة هيكون فى وقت قد ايه وسعر الرخصة كام؟
هو ده كل اللى هنشرحه بالتفصيل دلوقتى حالًا..
منين اقدر استخرج رخصة القيادة الدولية؟
فيه جهة واحدة فقط فى مصر هى المسئولة عن اصدار رخصة القيادة الدولية، وهى نادى السيارات والرحلات المصرى، فيه مواقع كتير اونلاين هتلاقيها بتعرض الخدمة ديه، لكن لازم تعرف ان كل ديه مواقع نصب والرخصة اللى هتطلعهالك غير معترف بيها.
نادى السيارات والرحلات المصرى هو المكان الوحيد والمضمون لاستخراج رخصة القيادة الدولية، والمقر بتاعه فى القاهرة فى وسط البلد، تحديدًا فى 10 شارع قصر النيل، اقرب محطة مترو ليه هى محطة مترو السادات، خمس دقايق مشى من المترو وهتلاقى مكانه على جوجل مابس بسهولة.
اما بالنسبة للمواعيد فالنادى بيكون شغال من 9:30 صباحًا لحد 2 الضهر.
بس خد بالك ان آخر معاد للتقديم على الرخصة بيبقى الساعة 1:30 الضهر.
تمام، ايه بقى الورق اللى آخده معايا وانا رايح؟
اولًا فيه ناس فاكرة انك لما تروح هناك هيعملولك اختبار قيادة جديد، ويخلّوك تسوق بين الاقماع ويسألوك عالاشارات وكدة، طبعًا كل ده مش حقيقى، انت هتروح مكتب عااادى جدًا تقدّم فيه الاوراق وتستلم الرخصة وبس.
الاوراق اللى لازم تاخدها معاك بتبقى كالآتى :
1- اصل رخصة القيادة المصرية بتاعتك + صورة ضوئية منها، ولازم الرخصة يبقى باقى على انتهائها اكتر من سنة
2- صورة من جواز السفر بتاعك
3- صورتين شخصيتين ليك مقاس 4*6
4- هتملى استمارة طلب التقديم على رخصة القيادة الدولية، وديه هتاخدها منهم هناك ماتقلقش، اهم حاجة املى البيانات بدقّة واتأكد ان حروف اسمك بالانجليزى مطابقة للباسبور بتاعك
5- هتدفع رسوم الرخصة 680 جنيه
هتقدّم الاوراق ديه، وهتستنى هناك بالظبط 15 دقيقة او 30 دقيقة بالكتير اوى، وهتلاقيهم بيسلّموك الرخصة.
والحقيقة ان من بين كل المكاتب والمصالح الحكومية اللى دخلتها فى حياتى، نادى السيارات والرحلات المصرى هو اكتر مكان سلس وبسيط وكل الاشخاص اللى هناك فى قمة الاحترام والذوق والتنظيم.
تمام استلمت الرخصة، ياترى ديه سارية لمدة قد ايه واقدر استخدمها فى انهى بلاد
مبدأيًا هى سارية لمدة سنة كاملة، بعد مالسنة بتخلّص بتقدّم على رخصة جديدة ومفيش اوبشن التجديد.
اما بالنسبة للبلاد اللى تستخدمها فيها، انت حرفيًا تقدر تستخدم الرخصة ديه فى اى بلد فى العالم ماعدا مصر، لأنك فى مصر هتستخدم رخصتك العادية.
وكمان خد بالك، عشان تستخدم الرخصة ديه فى اى بلد لازم تبقى داخل البلد ديه بتأشيرة سياحة، لو معاك اقامة يبقى رخصة القيادة الدولية مش هتنفعك ولاااازم تطلّع رخصة القيادة بتاعة البلد ديه نفسها.
وبكدة يبقى معاك كل المعلومات معاك عشان تستخرج رخصة القيادة الدولية وتنطلق وتلف العالم، وماتنساش تشوف باقى مقالتنا فى قسم الدليل الكامل وقسم مواقف وحكاوى السفر
