بتدوّر على ايه؟
بتدوّر على تأشيرة ماليزيا للمصريين؟
انت كدة هتتعب جدًا لأنك بتدوّر على حاجة مش موجودة اساسًا!
ماليزيا مالهاش تأشيرة للمصريين، اوصل فى أى وقت خد الختم وخش انبسط!
اه صدقنى بالبساطة ديه، عشان كدة مصريين كتير بيحبّوا ماليزيا وبيروحوها كتير، لأنها بدون فيزا، مجرّد ماتوصل هتاخد التاشيرة على باسبورك وتدخل، ومن غير ماتدفع ولا ملّيم كمان!.. لأن ماليزيا بتدّى تأشيرتها للمصريين مجانًا بدون أى مُقابل.
طيب ايه الورق اللى يبقى معايا لما اوصل مطار ماليزيا عشان يدّونى التأشيرة؟
انا شخصيًا لما سافرت ماليزيا، وانا سافرتها مرّتين لحد دلوقتى، مطلبوش منى غير الباسبور وتذكرة العودة.
طبعًا الباسبور لازم يكون باقى على انتهاءه اكتر من 6 شهور، وتذكرة طيران عودتك او خروجك من ماليزيا لازم تبقى مؤكدة وطابعها وواخدها معاك.
عادًة مش هيطلبوا يبصّوا على حاجة تانى.. فيه ناس بيطلبوا يبصوا على حجز فندق، فبرضه خليك انت فالسليم واطبع ورقة حجز الفندق اللى ناوى تقعد فيه.
طب تاشيرة ماليزيا اللى عند الوصول ديه، هقدر اقعد بيها كام يوم فى ماليزيا؟
تسعين يوم يامعلّم، يعنى 3 شهور كاملين تقدر تلف فيهم ماليزيا وتجيبها من شرقها لغربها!
كمان انت مش مُجبر على دخول مرة واحد فقط خلال ال90 يوم دول مثلًا، لا خالص، انا شخصيًا اول مرة رُحت ماليزيا خدت الفيزا اللى عند الوصول ديه، قعدت خمس ايام وبعدها طلعت على كامبوديا قعدت 3 ايام وبعدها رجعت على ماليزيا تانى، وساعتها خدت ختم جديد خالص بمنتهى السهولة، يعنى مالآخر كل مرة هتدخل فيها ماليزيا هتاخد ختم جديد ب90 يوم جُداد.
طب ايه موضوع التصريح الامنى اللى لازم اطلّعه عشان اسافر ماليزيا ده؟
ماليزيا فعلًا بتحتاج تصريح امنى، والتصريح الامنى ديه ورقة بتطّلب منك هنا فى المطار فى مصر لو انت مسافر دول معيّنة، يعنى هُم فى ماليزيا ملهمش دعوة بالتصريح الامنى ده ولا يعرفوا ايه ده اساسًا.
لو فيه مهنة فى خانة باسبورك يبقى انت مش محتاج تصريح امنى، انما لو باسبورك مافيهوش مهنة يبقى هتحتاج تطلع تصريح امنى، لكن كل ده فى الرسميات فقط، على ارض الواقع التصريح الامنى مش هيتطلب منك وانت رايح ماليزيا..
ف تقدر تاخد الريسك وتسافر من غيره وبرضه اسأل اكتر لو حد اتمنع من السفر بسببه، او تقدر تريح دماغك وتطلع تصريح امنى وهتلاقى مقالة على موقعنا فيه طرق استخراج التصريح الامنى..
طب وإذن الجيش؟
ده بيتطلب منك هنا من ظابط الجوازات، وده بقى مالوش دعوة انت مسافر ماليزيا او غير ماليزيا، ده كدة كدة لازم تطلّعه ايًا مان انت مسافر فين طالما بتنطبق عليك شروط معيّنة.
بس احب اطمّنك انك تقدر تستخرجه اونلاين من وانت قاعد فى بيتك فى خلال 3 ساعات بمنتهى السهولة اللى فالدنيا..
كدة معاك كل المعلومات اللى ممكن تحتاجها عن تأشيرة ماليزيا اللى عند الوصول، وبالمناسبة ماليزيا مش البلد الوحيدة اللى تأشيرتها سهلة كدة للمصريين، فيه اكتر من خمسين بلد تانية حول العالم تاشيرتهم سهلة للمصريين..
سافر سافر سافر.. مفيش متعة تساوى متعة السفر!
