خمسين دولار كاش، وجواز سفر سارى، وحجز فنادق تذكرة طيران عودة، وبس!
اه صدقنى بالبساطة ديه، عشان كدة مصريين كتير بدأوا مؤخرًا يزوروا تنزانيا، وقرروا ياخدوا خطة السفر لافريقيا واستكشاف حضارات وتجارب مختلفة عن اللى فى آسيا واوروبا، وكتير من المصريين اختاروا تنزانيا لافتتاح افريقيا وواحد من اهم اسباب اختيار تنزانيا هو ان تأشيرتها عند الوصول بالنسبة للمصريين، مجرّد ماتوصل هتدفع خمسين دولار وتاخد التاشيرة على باسبورك وتدخل، بمنتهى البساطة والسلاسة اللى فى الدنيا!
طيب ايه الورق اللى يبقى معايا لما اوصل تنزانيا عشان يدّونى التأشيرة؟
طبعًا لازم يبقى معاك باسبورك، وكمان لازم يكون باقى على انتهاء الباسبور اكتر من 6 شهور، وتذكرة طيران عودتك او خروجك من تتزانيا لازم تبقى مؤكدة وطابعها وواخدها معاك.
غير انهم هيطلبوا يبصوا على حجز فندق، فبرضه وانت مسافر لازم تكون طابع ورقة حجز الفندق اللى ناوى تقعد فيه.
وآخر حاجة هى كارت تطعيم الحمى الصفرا، واللى لازم تاخده قبل السفر باسبوع او اكتر وبيكون من اى مكتب صحة جنبك وبيخلص وانت واقف فى ربع ساعة..
طب التأشيرة اللى هاخدها عند الوصول ديه هتسمحلى اقعد كام يوم فى تنزانيا؟
تسعين يوم يامعلّم، يعنى 3 شهور كاملين تقدر تلف فيهم تنزانيا كلّها لحد ماتتعلم تتكلم تنزانى!
بس خد بالك ان التأشيرة ديه بتسمحلك بالدخول مرة واحدة بس، يعنى ماتقدرش تخرج من تنزلنيا وتدخل تانى خلال ال90 يوم، لو عملت ده هتدفع 50 دولار تانى وتاخد تأشيرة جديدة وانت داخل.
اما بقى لو عايز تاخد تأشيرة دخول متعدد فتقدر تاخدها عند الوصول برضه بس ساعتها سعرها هيكون 100 دولار، واخرج واطلع ساعتها براحتك بقى يامعلّم بس برضه كل دخولك وخروجك لازم يكون فى خلال 90 يوم من اول دخول ليك للاراضى التنزانية.
طيب معلش انا موسوس وعايز آخد تأشيرة تنزانيا اونلاين من وانا هنا فى مصر، ممكن؟
اه ممكن جدًا يامعلّم، صحيح انت كدة هتبقى بتطوّل الموضوع على نفسك بس فيه ناس بيحبوا ياخدوا التأشيرة اونلاين من قبل مايسافروا عشان يبقوا مرتاحين اكتر، ده لينك التأشيرة الاونلاين لتنزانيا : https://visa.immigration.go.tz/
ادخل واملى ابليكيشن، حط بيانات باسبورك سليمة وراجع كل حرف وكل رقم كويس، ادفع نفس الخمسين دولار بالكريدت كارد بتاعك، وسيبلهم الايميل بتاعك وهايبعتولك عليه التأشيرة، اطبعها واطلع عالمطار وبرضه لازم يبقى معاك تذكرة عودة مؤكدة وحجز فنادق لما توصل هناك.
بس نصيحتنا انك تاخد التأشيرة عند الوصول افضل، ماتحطش نفسك فى risk انك تغلط فى البيانات او ان التأشيرة تتأخر عليك.
طب هل محتاج اطلّع تصريح امنى عشان اعرف اسافر تنزانيا؟
الاجابة لأ، تنزانيا مش من الدول اللى بتحتاج تصريح امنى، للناس اللى ماتعرفش التصريح الامنى، ديه ورقة بتطّلب منك هنا فى المطار فى مصر لو انت مسافر دول معيّنة، وتنزانيا مش من ضمن الدول ديه.
طب وإذن الجيش؟
لا ديه بقى مافيهاش هزار، اذن الجيش ده بيتطلب منك هنا من ظابط الجوازات، وده بقى مالوش دعوة انت مسافر تنزانيا او غيرها، ده كدة كدة لازم تطلّعه ايًا كان انت مسافر فين طالما بتنطبق عليك شروط معيّنة.
بس احب اطمّنك انك تقدر تستخرجه اونلاين من وانت قاعد فى بيتك فى خلال 24 ساعة بمنتهى السهولة اللى فالدنيا..
كدة معاك كل المعلومات اللى ممكن تحتاجها عن تأشيرة تنزانيا سواء عند الوصول او اونلاين، وبالمناسبة تنزانيا مش البلد الوحيدة اللى تأشيرتها سهلة كدة للمصريين، فيه اكتر من خمسين بلد تانية حول العالم تاشيرتهم سهلة للمصريين تقدر تعرفهم من مقالتنا لازاى تسافر لوحدك الجزء الاول من قسم مواقف وحكاوى السفر
ماتنساش لما توصل تنزانيا بالسلامة تكتبلنا تجربتك الكاملة هناك، وتشاركنا بالصور واماكن الاقامة واحلى الشواطئ والخروجات..
تنزانيا بلد جميلة وافريقيا قارة لسه مش كتير استكشفوها، سافر واستكشف وغامر واستمتع!
