مفيش اوراق..
مفيش كشف حساب بنكى..
مفيش جواب من جهة العمل..
المالديف مالهاش تأشيرة للمصريين، اوصل فى أى وقت خد الختم وخش انبسط!
اه صدقنى بالبساطة ديه، عشان كدة مصريين كتير بيحبّوا المالديف وبيروحوها كتير وبالذات طبعًا لو شهر عسل، لأنها بدون فيزا، مجرّد ماتوصل هتاخد التاشيرة على باسبورك وتدخل، ومن غير ماتدفع ولا ملّيم كمان!.. لأن المالديف بتدّى تأشيرتها للمصريين مجانًا بدون أى مُقابل.
طيب ايه الورق اللى يبقى معايا لما اوصل مطار المالديف عشان يدّونى التأشيرة؟
طبعًا لازم يبقى معاك باسبورك، وكمان لازم يكون باقى على انتهاء الباسبور اكتر من 6 شهور، وتذكرة طيران عودتك او خروجك من المالديڤ لازم تبقى مؤكدة وطابعها وواخدها معاك.
عادًة مش هيطلبوا يبصّوا على حاجة تانى.. بس احيانًا بيطلبوا يبصوا على حجز فندق، فبرضه خليك انت فالسليم واطبع ورقة حجز الفندق اللى ناوى تقعد فيه.
طب الختم اللى هاخده عند الوصول ده، هيسمحلى اقعد كام يوم فى المالديف؟
تلاتين يوم يامعلّم، يعنى شهر كامل تقدر تلف فيهم ال1190 جزيرة بتوع المالديف كلّهم لحد ماتجيب اخرك انبساط وبلبطة!
طب هل محتاج اطلّع تصريح امنى عشان اعرف اسافر المالديف؟
الاجابة لأ، المالديف مش من الدول اللى بتحتاج تصريح امنى، للناس اللى ماتعرفش التصريح الامنى، ديه ورقة بتطّلب منك هنا فى المطار فى مصر لو انت مسافر دول معيّنة، والمالديف مش من ضمن الدول ديه.
طب وإذن الجيش؟
لا ديه بقى مافيهاش هزار، اذن الجيش ده بيتطلب منك هنا من ظابط الجوازات، وده بقى مالوش دعوة انت مسافر المالديف او غيرها، ده كدة كدة لازم تطلّعه ايًا كان انت مسافر فين طالما بتنطبق عليك شروط معيّنة.
بس احب اطمّنك انك تقدر تستخرجه اونلاين من وانت قاعد فى بيتك فى خلال 3 ساعات بمنتهى السهولة اللى فالدنيا..
كدة معاك كل المعلومات اللى ممكن تحتاجها عن تأشيرة المالديف اللى عند الوصول، وبالمناسبة جزر المالديف مش البلد الوحيدة اللى تأشيرتها سهلة كدة للمصريين، فيه اكتر من خمسين بلد تانية حول العالم تاشيرتهم سهلة للمصريين وهتلاقى مقالة فيها كل الدول ديه على موقعنا..
ماتنساش لما توصل المالديف بالسلامة تكتبلنا تجربتك الكاملة هناك، وتشاركنا بالصور واماكن الاقامة واحلى الشواطئ والخروجات، وابقى ابعتلنا صورتك مع الاناناس عالمحيط، ابو صلاح مش اجدع منك فى حاجة!
