لو مسافرتش برا مصر قبل كدة ونفسك تاخد الخطوة ديه وعايز تعرف تبدأ ازاى، يبقى السلسلة ديه مهمة جدًا ليك.
لأنك هنا هتعرف كل حاجة تخص السفر برا مصر، اختيار البلد، يعنى ايه تأشيرة وازاى تطّلعها، ازاى تحسب تكاليف السفرية، واخيرًا ازاى تعمل برنامج فالبلد اللى هتسافرها.
كل ده هتعرفه وهتقدر تعمله بسهولة ولوحدك تمامًا، بعيد عن اى شركات سياحة.
اهم وأول خطوة هى انك تختار البلد اللى انت عايز تسافرها، لأن رغم بساطة النقطة ديه الا انها اهم نقطة!
ناس كتير بتقرر تسافر لمجرّد السفر، وديه حاجة حلوة مش وحشة، بس افتكر، انت مسافر تنبسط، فلازم تدخل تتفرج عالبلد عالانترنت، اتفرج على صور وڤيديوهات، شوف احلى مُدن فى البلد، شوف احلى انشطة وخروجات ممكن تعملها، شوف انت بتحب الطبيعة ولا الشوبينج ولا الجبال ولا التلج ولا السهر والدوشة، وماتنساش تشوف احسن وقت فالسنة تزور فيه البلد، وكل بلد وليها طبيعتها.
حمّس نفسك وتخيّل كل صورة هتشوفها عالنت وانت واقف بتتصور صورة احلى منها!😉
إحنا اذواقنا مختلفة، والبلد اللى انا ممكن اشوفها هادية وجميلة انت ممكن تشوفها مملّة ومافيهاش حاجة تتعمل، فركّز انك تختار البلد كويس وتقرا عنها كتير على جوجل، وكمان حط اسم البلد عاليوتيوب هتلاقى ڤيديوهات كتير بتتكلم عن البلد وبتشرحلك كل حاجة فيها، يعنى احنا مثلًا عملنا ڤيديو عن سريلانكا بنقول فيه كل حاجة موجودة فالبلد ديه، هتلاقوه عاليوتيوب بسهولة..
بعد ماتتفرج على بلاد كتير هتكون حددت كذا بلد همّ اللى عجبوك ونفسك تسافرهم، اكتبهم فى ورقة وخش عالخطوة اللى بعد كدة، انهى بلد منهم هى الانسب ليك؟
بص ياسيدى، فيه 3 نقط بيختلفوا من بلد للتانية، احنا بنسمّيهم مثلث السفر، دول همّ اللى هيحددوا اذا كان هينفع تسافر البلد ديه ولا لأ
1- التأشيرة
2- تذكرة الطيران
3- تكاليف المعيشة
هتبدأ بأكتر بلد عجبتك، هتبص عالتأشيرة بتاعتها، وتشوف سعر تذكرة الطيران، وتشوف تكاليف المعيشة فيها غالية ولا لأ.
فيه بلاد ممكن تلاقى تأشيرتها سهلة وطيرانها رخيص، بس البلد نفسها غالية جدًا!
وبلاد تانية ممكن تلاقى المعيشة فيها رخيصة اوى، وتأشيرتها سهلة، بس يكون سعر الطيران غالى.
طيب ازاى اعرف الحاجات ديه كلّها؟
اتطمن، الموضوع بسيط جدًا، احنا معاك وهنشرحلك ازاى تعرف كل حاجة من ال3 حاجات دول بسهولة جدًا.
تعالوا نبدأ معاكوا بالمحور الاول؛
التأشيرة
ناس كتير بتتخض من موضوع التأشيرة ده، بيستصعبوه، فاكرين ان كل البلاد محتاجة اوراق كتيييير وكشف حساب بنكى كبييير وغيره وغيره!
فى حين ان الموضوع عكس كدة خالص!
تعالوا نجيب الموضوع من اوّله، يعنى ايه تأشيرة او ڤيزا اصلًا؟
التأشيرة اوالڤيزا ببساطة هى اذن من البلد اللى انت رايحها يوافقوا فيه انك تدخل البلد ديه.
تخيّل معايا انك ضيف ورايح تزور ناس، مش لازم تستأذن الاول؟
لازم تخبّط على الباب وأصحاب البيت بقى يفتحولك او لأ.
فيه اصحاب ڤلل وقصور، اغنيا، وبيوتهم جميلة ومريحة، دول همّ الدول الغنيّة، اغلب دول اوروبا، ودول تانى زى امريكا، كندا، استراليا، نيوزيلاندا، وغيرهم كتير.
الدول ديه تعتبر من اصعب البلاد اللى ممكن تسافرها، لازم يشوفوا انت من انهى بلد الاول، عشان فيه ضيوف كتير بيبقوا من بلاد فقيرة بيروحوا الدول الغنية ديه على اساس انهم رايحين سياحة، وبيكسروا ويقعدوا ومايرجعوش، عشان كدة البلاد ديه بتطلب ضمانات وأوراق كتير عشان تسمحلك بزيارتها.
طيب ايه الضمانات اللى بتطلب منك عشان تدخل البلاد ديه كسائح مصرى؟
طبعًا كل بلد بتطلب اوراق وضمانات غير التانية، بس تقدر تقول كدة ان فيه مجموعة حاجات اساسية هاتلاقيها مشتركة بين كل الدول الصعبة ديه، وهىّ :
– كشف حساب بنكى قوى لآخر ست شهور ويكون عليه معاملات كتير، ويكون مُرتبك بينزل عليه كل اول شهر، عشان يتأكدوا انك شخص معاه فلوس كتير ومش جايلهم يهرب من الفقر. “كشف حساب باباك لو انت طالب، لازم الرقم يكون عالاقل ضعف مصاريف السفرية”
– اثبات قيد من الجامعة لو انت طالب، عشان يتأكدوا انك عندك سبب ترجع عشانه زى انك تكمّل دراستك.
– خطاب من جهة عملك لو انت شغال فى شركة، عشان يتأكدوا انك شغال فى شركة كبيرة وكدة “كل مالشركة تبقى اكبر والمرتب اعلى كل ما فرصتك تزيد”
– باسبورك يكون فيه اختام كتير، عشان يتأكدوا انك حد بيسافر كتير ويرجع بلده تانى عادى.
دوشة.. دوشة كتييييييير، اوراق وتقديمات وحجز معاد فى السفارة واحيانا انترڤيو كمان!
طبعًا احيانًا كتير ناس بتقدر تاخد تأشيرة اوروبا عادى، ولو احتجت اى مساعدة تقدر تبص على قسم التأشيرات بتاعنا، وهتلاقى حاجات كتير تساعدك تستخرج التأشيرات الصعبة ديه، بس لو عايز تخلص من كل ده، وتسافر من غير ولا ورقة، ومن غير مايبقى عندك حساب فالبنك اصلًا؟
سهلة والله
انا شخصيًا سافرت 7 بلاد اجمل من بعض ( لبنان – سريلانكا – اندونيسيا – الامارات – ماليزيا – تنزانيا – كامبوديا) من غير ما اطلّع اى ورقة من اللى فوق دول، ولا حتى كان عندى حساب فالبنك اصلًا!، وده لأن فيه حوالى 50 دولة حوالين العالم اجراءات دخول المصريين ليهم سهلة جدًا، وبيسمحوا للمصريين بالدخول من غير كل الدوشة ديه.
طيب برضه اجراءات التأشيرة السهلة ديه اللى هى ايه يعنى؟
اولًا ممكن تكون الدولة من غير تأشيرة اصلًا!
او ممكن الدولة تكون هاتديلك التأشيرة بتاعتها لما توصل المطار.
او فيه اوبشن تالت سهل برضه هو ان الدولة يبقى ليها ابليكيشن اونلاين، تدخل تملى ابليكيشن بسيط تحط فيه بياناتك فيبعتولك ورقة عالايميل تطبعها وتبقى هىّ ديه التأشيرة وتسافر بيها!
آه، بالبساطة ديه!!
يعنى باسبورك هيكون كافى عشان تسافر البلاد ديه، وبالمناسبة تقدر تعرف كل الورق المطلوب لاستخراج الباسبور فى مقالة الاوراق المطلوبة لاستخراج الباسبور فى قسم الاوراق و التأشيرات..
وبرضه ماتنساش اذن الجيش والتصريح الامنى، دول بيطّلبوا فى حالات معيّنة وسهل جدًا تستخرجهم.
طيب هل الدول ديه فقيرة يعنى او مش سياحية او وحشة عشان كدة اجراءاتهم سهلة؟
همّ فيهم طبعًا دول كتير مش سياحية او فقيرة، بس فيهم برضه دول اكتر جميلة جدًا وسياحية وتستاهل انك تزورها.
ايه بقى اشهر البلاد اللى تأشيرتها سهلة جدًا للمصريين؟
خد عندك ياسيدى :
1- مدغشقر
2- سريلانكا
3- طاچكستان
4- هونج كونج
5- اندونيسيا
6- ماليزيا
7- موريشيوس
8- لاوس
9- لبنان
10- كامبوديا
11- جزر المالديڤز
12- نيبال
13- كوبا
14- سيشل
15- ڤيتنام
16- كينيا
17- ايران
18- قطر
19- اوزباكستان
20- بورتوريكو
21- تنزانيا
اذن، لو انت شخص عايز يهرب من وجع الدماغ بتاع التأشيرة وعايز ينجز حاله، تقدر تحط اسامى البلاد اللى فوق ديه على جوجل وتتفرج على صورهم وانت حاطط فى بطنك بطيخة صيفى من موضوع الڤيزا.
ملحوظة مهمّة بزيادة :
زى ما فيه دول تأشيرتها صعبة جدًا، ودول تانية تأشيرتها سهلة جدًا، فيه مجموعة دول تقدر تقول عليها انها فالنص، يعنى محتاجة حبة اوراق عشان تاخد التأشيرة بتاعتها، بس فى نفس الوقت اجراءاتها مش معقّدة اوى، وبنسبة كبيرة لو قدمت الورق المطلوب بالظبط هتتقبل.
زى ايه مثلًا؟
1- تايلاند
2- قبرص
3- تركيا
4- روسيا
5- چورچيا
6- تونس
7- الصين
8- المغرب
9- جنوب افريقيا
10- البرازيل
11- ارمينيا
12- الهند
13- الفلبين
كدة انت عرفت كل حاجة تخص التأشيرات، بين الدول السهلة او المتوسطة او الصعبة، ولو عايز تريّح دماغك روح للدول السهلة، وتقدر تعرف تأشيرة كل بلد بالتفصيل لو دخلت على قسم التأشيرات.
وبعد ماتستخرج التأشيرة هايبقى كل اللى مطلوب منك انك تحجز تذكرة الطيران وتسافر.
تذكرة الطيران!
طيب بكام تذكرة الطيران ده بيقولوا بتبقى غالية جدًا!
وازاى احجزها اصلًا!
وكمان هحجز الفنادق ازاى؟!
تذاكر الطيران والاقامة دول همّ المحور التانى بعد ما عرفنا كل حاجة تخص الڤيزا.
كل حاجة تخص تذكرة الطيران والاقامة هتلاقوها فالجزء التانى من سلسلة المقالات ازاى تسافر لوحك..
