لو انت من المهوسيين بالسفر للدول الآسيوية يبقى اكيد سمعت عن كامبوديا، ولو سمعت عن كامبوديا يبقى لاااازم تكون سمعت عن اشهر جزيرتين هناك، واللى متصنّفين كتانى احلى جُزر فالعالم حسب تصنيف National Geographic
جزيرتى كوه رونغ و كوه رونغ ساملويم koh rong & koh rong samloem
كلمتين عن السياحة فى كمبوديا وعن تأشيرة كمبوديا للمصريين اللى مفيش اسهل منها :
عاصمة كمبوديا اسمها فنوم بينه – phnom penh ، لو معاك وقت عدّى عليها، بس لو وقت سفريتك كان ضيّق زى حالاتى، ماتروحش العاصمة ولا تنزل المطار بتاعها اصلًا.
اومال تروح فين؟
سيهانوك ڤيل – Sihanoukville
وديه مدينة عالبحر فى كامبوديا برضه، وليها مطار خاص بيها، ويعتبر هو مطار جزيرة koh rong لانه اقرب مطار ليها.
انا رُحتها من ماليزيا وكان سعر تذاكر الطيران ذهاب وعودة 3000 جنيه مصرى توتال، مع طيران airasia بس خد بالك انك مالكش غير شنطة واحدة سبعة كيلو عالطيارة، لو عايز وزن زيادة يبقى هتدفع زيادة، سعر الشنطة ال23 كيلو بيبقى فى حدود 20 دولار، لكن انصحك توفّر الفلوس ديه وتتعامل بالسبعة كيلو، ولو اتزنقت فالمطار ابقى إلبس يامعلّم!
لا مش قصدى، قصدى إلبس بجد، طلّع اللبس اللى عاملك وزن زيادة وافضل البس لحد ما الوزن يوصل سبعة كيلو، وربنا معاك بقى!
طب التأشيرة؟
-اونلاين، ب 35 دولار وبتطلع فخلال 24 ساعة.
تخش على الموقع الرسمى وتملى بيانات باسبورك، وتدفع المبلغ بالكريدت كارد، هيجيلك ايميل فى ساعتها انهم استلموا الطلب وهيردّوا عليك فى خلال 24 ساعة، وفعلا فى خلال يوم هيجيلك ايميل تانى بالتأشيرة، اطبع منها نسختين بالالوان واطلع عالمطار..
وانت داخل فالمطار ممكن يغلّسوا عليك شوية، مش عشان همّ رخمين لأ، ده عشان همّ مش عارفين ايه مصر ديه، اه وربنا..
ظابط الجوازات فضل متنّح فى باسبورى شوية، بعدين خدنى الاوضة للمدير بتاعه تقريبًا وقاله شوف الباشا ده ايه دنيته..
المدير برضه ميعرفش ايه مصر ديه وتقريبًا اول مرة يشوف باسبورنا الاخضر العظيم، قام فتح جوجل وعمل سيرش عن ام الدنيا، وبدأ يسألنى عن تعدادنا السكانى، واسم الرئيس بتاعنا، واسم العاصمة، وانا ساقط جغرافيا ياخوانّا بس اشطة سدّيت معاه💪😂
هو شاف تذكرة العودة، وشاف التأشيرة الاونلاين اللى انا كنت طابعها، وكمان طلب حجز الفندق، والكاش اللى معايا “انا كان معايا 600 دولار وده مبلغ كتير اوى على 3 ايام اصلًا “آه مكنش معايا وقت اوى ف قعدت 3 ايام بس.. للأسف”
فضلت اقوله ياعم الحاج الفراعنة.. طب مو صلاح.. طب الهرم.. طب فيصل وهو عمال يبص فالاوراق ويبعتهم لواحد صاحبه عالواتس اب، تقريبًا بيقوله بُص اكتشفنا كائن فضائى..
المهم عدّى بتاع ربع ساعة كدة وفالاخر قام مدخّلنى عاااادى جدًا، طب كان ايه لازمة القلق ده كله ياعم الحج!، قبل ما اخرج من المطار اشتريت خط اسمه smart، ب 3 دولار وفيه دقايق ونت يكفّونى طول اقامتى هنا وكنت عايز كمان اغيّر عُملة بس اكتشفت ان الناس فى كامبوديا بيتعاملوا بالدولار، وده لأن عملتهم واقعة جدًا فمش بيستخدموها – ال4000 منها بدولار! – وبكدة بقيت مش محتاج اغيّر عملة وهووووووب طلعت من مطار سيهانوك ڤيل وبدأت رحلة الوصول للجزيرة.
كنت عايز اخد مواصلة للمينا الرئيسة بتاعة المدينة عشان منها اخد المركب لجزيرة koh rong
بس للاسف مفيش اى مواصلة من عند المطار للمينا غير التاكسى، وده تسعيرته ثابتة 20 دولار ايًا كان عدد اللى هيركبوا، ومتحاولش تفاصل عشان محدّش هينزّلك فالسعر.
انا بقى طلّعت الشخصية المصرية الاصيلة اللى جوايا، كنت اتعرفت على 3 شباب ماليزيين وانا بشترى الخط من جوه المطار، وقولتلهم تعالوا نخمّس فالتاكسى سوا، والخطة نجحت وكُلّنا دفعنا اقل..
وصلت المينا، اللى هى سنتر المدينة برضه، على بُعد نص ساعة تقريبًا بالتاكسى من المطار، شوارع مكسّرة ومطبّات وتصليحات وحاجة تحسسك انك سافرت زرزارة البلد مش كامبوديا، مش هكدب عليكم انى اتقفلت شوية، بس فضلت اصبّر نفسى وافتكر صور الجزيرة اللى شوفتها عالنت وانا بجهّز للسفرية..
يادوب وصلت المينا، وهناك فيه مكاتب سياحة كتير بتبيع تذاكر رحلات المراكب اللى هتوصّلك للجزيرتين، كنت منشّن على مكتب منهم يعتبر متوسط فالخدمة والسعر، اسمه Virak Buntham ، حجزت مركب ب 11 دولار كانت هتتحرك بعد ساعة، قعدت فى مطعم جنب المينا طلبت بيتزا كانت غالية شوية “10 دولار بالبيبسى😂” بس كانت كبيرة وانا كنت واقع مالجوع، المركب اتأخرت نص ساعة بس عادى فضلت مستنى فالمينا، لحد ما جت المركب خدتنا ووصلت جزيرة koh rong اخيرًا..
جزيرة koh rong تعتبر هى الجزيرة الاكبر واللى فيها حاجات اكتر، اما koh rong samloem فبيطلقوا عليها لقب الشقيقة الصغرى..
انا كل رحلتى كانت 3 ايام، ف مكنتش عارف هلحق اروح الجزيرتين ولا هكتفى ب koh rong بس..
خدت المركب من المينا وبدأ رحلته للجزيرة، ساعة إلا ربع تقريبًا فالمحيط اللى لون الميّة بتاعته ماشوفتش زيّها فى حياتى، وبسمع عمّنا ارمسترونج it’s a wonderful world واخيرًا رجلى حطّت عالجزيرة، او خلّينى اقول عليها جنة!!.. جنة كدة ربنا حاططها فى وسط البحر..
اجمل شط شوفته فى حياتى حرفيًا، لون الرملة ابيض بيلمع زى الكريستال!، بيسمّوه الWhite sand beach، الاجواء قمة فالجمال والموود العام رواق الرواق..
اول مابتنزل من المركب بتلاقى نفسك فالممشى الرئيسى بتاع الجزيرة، هو صغير ممكن تمشيه كله فى عشر دقايق من اوله لآخره، كلّه مطاعم وكافيهات وهوستيلز عالبحر مباشرة!
يادوب حطيت هدومى فالهوستيل ونزلت ابلبط طوالى!!
انا اخترت هوستيل اسمه Dragon Den Hostel، حجزته من بوكينج، ومكانه فى قلب الممشى بتاع الجزيرة، سعر الاوضة السينجل بحمّام خاص كان 14 دولار فالليلة، مستوى الاوضة كان متواضع وبسيط جدًا، انا فالعادة بقعد فى غُرف مشتركة بس المرّادى لاقيت فرق السعر مش كبير وهمّ 3 ايام بس ف قلت ابقى مسرف بقى!.. اما صاحب الهوستيل فكان راجل زى العسل وهيساعدك بأى معلومات تحتاجها، كان راجل من كندا اسمه Jay ومتجوز وعايش مع مراته فالهوستيل وده كان مخلّى الهوستيل امان جدًا، الجزيرة كلّها امان جدًا بالمناسبة.
كان باقيلى ساعتين قبل مالشمس تغيب فقررت اقضيهم عالبحر، وعمرى مانسى اول ربع ساعة ليا فى البحر لأنها كانت من اعظم اوقات حياتى، فضلت خلالها ألوم نفسى انى مش هقعد فالجنة ديه غير 3 ايام بس، أما بالليل اتمشيت وبدأت اتعرف على اماكن الاكل الحلوة والسهرات اللطيفة فالجزيرة، وكمان عرفت كل الactivities المختلفة اللى ممكن تتعمل، وصاحب الهوستيل ساعدنى كتييير فالموضوع ده، وقررت انى من تانى يوم هبدأ الاكتيڤيتيز كلّها، وخصوصًا ان انا رحلتى 3 ايام بس ويعتبر كدة ضاع منهم يوم اهو فالوصول..
وفعلًا تانى يوم صحيت وبدأت على طول، كان يوم 22 – 2 – 2020 وعمرى ما هنسى التاريخ ده لأنى فعلًا بعتبره من اجمل ايام حياتى، لأنى عملت فيه الخمس انشطة الرئيسين فالجزيرة، كلّهم فى يوم واحد وكلّهم اعظم من بعض!
فى الجزء التانى من المقالة هحكى عن كل الانشطة اللى عملتها فالجزيرة، تكاليف السفرية كلّها، الحبال اللى اتشعلقت عليها فقلب الغابة والمياه اللى بتنوّر فالضلمة، وكل حاجة تخص جنة koh rong الجنة المعزولة عن العالم حرفيًا..
تقدروا تلاقوا الجزء التانى فى قسم الدليل الكامل.
