كوه رونغ – الجزء التانى

ده الجزء التانى من خلاصة تجربتى فى جزيرة كوه رونج فى كمبوديا، واللى فيها هحكى عن اهم 5 انشطة سياحية لازم تعملهم لما تروح كامبوديا : 

1- الهاى روبس والزيبلاين – high ropes and Zipline

2- تأجير السكوتر عالبحر

3- شاطئ 4K Beach – اجمل شاطئ فى جزيرة koh rong وتانى اجمل شاطئ فالعالم!

4- مشاهدة ظاهرة البلانكتون – plankton 

5- الحفلات اللى عالبحر

هحكيلكم هنا عن الخمس انشطة بالتفصيل والاسعار والصور كمان، اما لو عايز ترجع خطوة لورا وتقرا الجزء الاول عن تجربتى فى كمبوديا تقدر تلاقيه على موقعنا، وفيه هتعرف كل حاجة عن التأشيرة للمصريين والطيران والاقامة وظابط الجوازات بتاع كامبوديا اللى ميعرفش ايه مصر ديه اساسًا، اما ده فهو الجزء التانى ويلا بينا نشوف ايه احلى انشطة تتعمل فالجزيرة :

أولاً : الهاى روبس والزيبلاين high ropes and Zipline 

وده سنتر مشهور جدًا فالجزيرة، سعر الاكتيڤيتى فى حدود 30 دولار – بس الحقيقة انه كان يستاهل المبلغ ده ويمكن اكتر شوية كمان..

ساعة ونص تقريبًا بنخوض فيهم مغامرات كلّها فالهوا، انت جوه الغابة والادغال حرفيًا، بتتحرك بين 21 برج خشبى، اما بتمشى على حبل او بتتعلق فى حبل او بتمشى على خشب رفيّع او حاجات كدة كتير..

مغامرة فعلًا مش سهلة وهتخلّى الادرينالين يدب فعروقك!

ثانيًا : نأجر سكوتر بقى ونسوق عالبحر!

الصراحة الصراحة، قبل اليوم ده كان عمرى ما سُقت سكوتر فى حياتى! كنت بركب عجل بس..

لاقيت اجانب كتير سايقين سكوترات عالبحر، ولأ ماتقلقش مش هتغرز لأن الرملة ناشفة نسبيًا..

لاقيت مكتب سياحة صغيرة كدة بيأجر سكوترات، بكام ياعمّنا قالى معاك لحد الغروب بعشرة دولار وملكش دعوة بالبنزين..

قولتله عظمة، قالى بتعرف تسوق؟

قولتله shame on you ياعم الحج ازاى تسأل السؤال ده، دانا برفع حصان من الاعدادية، بس معلش استأذنك تقولى بيشتغل ازاى؟

بصّلى وبدأ يشُك فيّا، قولتله لاااا اصله deferent model بس ياعمّنا عاللى انا متعوّد عليه، قام مورّينى بيشتغل ازاى، طلب منى اثبات شخصية قمت سايبله كارنيه الجامعة على انه الباسبور ووصّيته ياخد باله منه ويحطّه فعينيه

وخدت السكوتر وانطلقت، اول مرة اسوق سكوتر فى حياتى كانت على اجمل تانى شاطئ رملى فالعالم!

لفيت واستكشفت كذا حتة مختلفة، ورُحت اجمل شاطئ فالجزيرة وهو 4K beach

ثالثًا : اجمل شاطئ فالجزيرة 4K beach 

ده بقى ياسيدى يعتبر اجمل شط عالجزيرة، انت لو عايز تنزل البحر فالجزيرة ديه هايبقى عندك اختيارات لشواطئ كتير، اقربهم هو الشط اللى فالممشى الرئيسى واسمه koh toch beach، اما اجملهم شط اسمه 4k beach

فيه ناس بتكول انه اتسمّى كدة لأن طوله 4 كيلومتر، بس هو فالحقيقة طول 2.7 كيلومتر بس.

وناس تانية بتقول انه اتسمى كدة نظرًا لحلاوته، اول ماتشوف لون الميّة ولون الرملة هناك هتحسن انك دخلت ف فيلم او ڤيديو متصور بجودة ال4K !!

طبعًا عشان تقعد هنا مش محتاج تدفع اى حاجة لأى حد، افرش الفوطة بتاعتك وحط حاجتك وانبسط!

الدنيا امان جدًا وكل الاجانب حواليك هتلاقيهم بيعملوا كدة..

فضلت فالشط ده لحد الغروب تقريبًا، ورجعت سلّمت السكوتر وخدت كارنيه الجامعة اللى من غيره مش هعرف ارجع مصر “ده اللى انا قولته للراجل” وهوب انطلقت عالمغامرة الرابعة..

رابعًا : حد شاف الميّة اللى بتنوّر؟

ديه ياسيدى ظاهرة طبيعية من اجمل الظواهر اللى ممكن تشوفها فى حياتك! واسمها الPlankton..

ديه ظاهرة بتحصل فى شواطئ مُعيّنة، وفى اوقات معيّنة من السنة، مالهاش مواعيد ثابتة، محتاج تبقى محظوظ عشان تشوفها، ومحتاج كمان تاخد قارب وتبعد عن اى حتة فيها نور، كل ماتبقى فى حتة عتمة اكتر فالبحر، كل ما فرصتك هتزيد فى انك تشوف الانوار ديه، وده اللى انا عملته بالظبط!

حجزت رحلة مع مكتب سياحة هناك، سعر الرحلة ثابت 5 دولار، ومدتها نص ساعة تقريبًا، بياخدك بالقارب لحتة بعيدة عن اضواء الجزيرة وبتبقى ضلمة كُحل، بيدّيلك لايڤ چاكيت وماسك وبتنط فالميّة، بتنزّل راسك تحت المياه وكل مابتحرك ايدك او رجلك بتلاقى انوار عجيبة بتظهر فالمياه!

للاسف عشان الضلمة معرفتش اخد صور او ڤيديوهات للظاهرة ديه، بس ادخل على جوجل او يوتيوب واكتب plankton in koh rong island وهتجيلك كل حاجة تخص الظاهرة ديه.

خامسًا : نختمها بسهرة جميلة بقى ونجرّب الnight life..

هنا فيه اماكن كتير بتعمل سهرات، كل يوم مكان مختلف، اغلبهم بتبقى حفلات مزيكا عالية ودوشة ورقص عالبحر وكدة، لو انت حد بيفضل المزيكا الهادية والحفلات الرايقة يبقى خليك سهران فى اى كافيه عادى عالبحر وبلاش تجرّب الحفلات..

انما لو انت حد مجنون بفكرة التجربة ومش بتسيب حاجة غير لما عالاقل تجرّبها مرة، يبقى شوف المكان اللى هايبقى عامل حفلة وروح جرّبها..

انا رُحت حفلة عالبحر وسهرت لحد الصبح، كان المفروض انى فتالت وآخر يوم ليا هناك اروح الجزيرة التانية، بس للاسف صحيت متأخر وكنت مهدود من اليوم الطويل اللى قبله، ومكنش ليا مزاج ألم هدومى واروح مكان جديدة وأوضة جديدة وانا كلّها يوم وماشى، وخصوصًا انى سألت وعرفت ان الجزيرة التانية مافيهاش حاجات مختلفة ممكن تتعمل عن اللى عملته، فقررت اقضى اخر يوم عالبحر بفضّى دماغى وأودّع واحدة من اجمل الجُزر اللى رُحتها فى حياتى، جزيرة koh rong

كدة انا حكيت كل حاجة عن الجزيرة، بكل التفاصيل الممكنة، ناقص بس اقولكم كام ملحوظة كدة مهمّين جدًا..

1- لو عندك فوبيا مالحشرات بلاش تروح، انا مش بقول ان هى مليانة حشرات، بس هتلاقى هناك ابراص كتير واحيانًا حاجات عجيبة بتطير كدة، مفيش حاجة مؤذية بس لو عندك فوبيا يبقى بلاش.

2- رغم ان الجزيرة بتتعامل بالدولار الا انها متعتبرش غالية اوى، متوسط سعر الطبق الرئيسى فى اى مطعم عالبحر 4 دولار تقريبًا، والبيبسى فى اى سوبر ماركت بنص دولار وفالمطاعم بدولار.

3- هتلاقى هناك حاجة مشهورة بتتباع اسمها الـhappy cookies ، عبارة عن كيك بالحشيش، سعرها 7 دولار، انصحك ماتشرتيهاش، لو هتشتريها كل نُصّها بس، لو هتاكُلها كلّها يبقى اعمل ده وانت جنب الهوستيل بتاعك..

اما لو اشتريتها، وكلتها كلّها، وكنت بعيد عن الهوستيل بتاعك، يبقى هتروح عليك نومة اليوم اللى بعده ومش هتروح الجزيرة التانية وهتقعد تقول “عادى اصلًا الجزيرة التانية مافيهاش حاجات مختلفة تتعمل” و “عايز اودّع البلد” وكلام خايب كدة.

4- بخصوص الاكل ف الجزيرة عليها كريبات – بيتزات – ساندوتشات – سى فوود، ف متقلقش خالص لو عندك عقدة من الاكل الاسيوى لأنك مش هتلاقيه عالجزيرة اصلًا..

5- الشعب الكامبودى مسالم وفحاله، انت اه مش هتحس انهم ودودين بس همّ فى نفس الوقت فعلا مش مؤذيين وبيخافوا عالسياحة فى بلدهم عشان ديه اللى بياكلوا منها عيش.

وعمومًا اغلب اللى عايشين عالجزيرة اجانب قرروا يرموا كل حاجة وراهم يروحوا يعيشوا فالجنة ديه..

ملحوظة مهمة : الزيارة كانت سنة 2020 ف ممكن جدا تكون الاسعار ديه اتغيرت، حسب بقى الوقت اللى انت بتقرا فيه المقالة ديه دلوقتى.

حُبنا للسفر هو الدافع الرئيسى ورا كل كلمة بنكتبها، سافر وانطلق ولو عجبتك المقالة شارك بيها اصحابك عشان تسافروا سوا، السفر سهل وممتع❤️