لو بتفكّر تسافر سريلانكا وعايز تعرف عنها كل حاجة، التأشيرة والطيران وتكاليف السفر بالتفصيل، المدن اللى لازم تروحها والمغامرات اللى تعملها فى كل مدينة، يبقى هات دماغك وتعالى عشان هنحكى هنا كل التفاصيل اللى تخص السفر الى سريلانكا، الجزيرة المعزولة عن باقى العالم واللى تعتبر واحدة من اجمل بلاد آسيا والعالم.
هنا هتلاقى مغامرات كتير، سيرلانكا محتاجة قلب ميت عشان فيه مغامرات وانشطة فعلًا مش سهل ان اى حد يعملها، وزى ماهتلاقى مغامرات هتلاقى كمان شواطئ وكافيهات وأماكن سياحية رايقة وهادية، وديه واحدة من اجمل مميزات السياحة فى سريلانكا وهى التنوع، كل حاجة ممكن تخطر على بالك هتلاقيها موجودة فى سريلانكا!
تعالوا نبدأ معاكم بالتأشيرة واللى تعتبر من اسهل التأشيرات للمصريين فالعالم!
تأشيرة سريلانكا – ياجدع والله مانت نازل مالبيت!
مش محتاج غير باسبورك بس!
مش محتاج حتى تنزل من بيتكم، وده لأنها تأشيرة اونلاين، تدخل على الموقع الرسمى، تملى ابليكيشن التقديم عالتأشيرة، تدفع 50 دولار بالكريدت كارد بتاعك، وتسيبلهم الايميل بتاعك، وفى خلال 48 ساعة هتجيلك التأشيرة على الايميل، اطبعها واطلع عالمطار على طول!
ولا كشف حساب ولا خطاب من جهة العمل ولا حجز طيران ولا تصريح امنى ولاااا تشغل بالك بأى حاجة، الموضوع سهل وبسيط وده من اهم اسباب ان مصريين وعرب كتير بدأوا يفكّروا فى السفر لسريلانكا
ده الموقع الرسمى للتأشيرة، وخد بالك لأن فيه مواقع تانية كتيرة هتلاقى السعر فيها اغلى من ده، خلّيك فالموقع الرسمى، انا شخصيًا طلّعت من خلاله اكتر من 100 تأشيرة لكل الناس اللى سافروا معانا قبل كدة، فـ الموقع مضمون ومتجرّب : https://www.srilankaevisa.lk/index.html
ولو عايز تعرف تفاصيل استمارة التقديم بالظبط، وتملى الخانات ازاى، وإيه الغلطات الشائعة اللى الناس بتقع فيها، كل ده هتلاقيه مشروح بالتفصيل فى ازاى اقدم على تأشيرة سريلانكا، الخطوات بالصور وبالتفصيل..
الطيران – هايبقى معاك ترانزيت فى دولة عربية، ماتفكّر تخطفلك بلد جديدة فى سكّتك!
مفيش طيران مباشر من مصر لسريلانكا، وكدة كدة هايبقى فيه ترانزيت اللى 90٪ هايبقى فى دولة عربية، طيب ياترى انهى دولة عربية؟
ديه بقى هتبقى حسب خطوط الطيران اللى هتحجز عليها، اول مرة اسافر حجزت مع الخطوط السعودية فالترانزيت بتاعى كان فى السعودية.
وبعدها بقى جرّبت حاجات كتير، طيران الخليج هينزّلك ترانزيت فى البحرين، الخطوط الكويتية هتنزّلك فى الكويت، العمانية فى عُمان وفلاى ايميرتس او الاتحاد هينزّلوك فالامارات.
ناس كتير بتحجز الطيران بترانزيت طول عن عمد، عشرة او اتناشر ساعة، ياخدوا تأشيرة البلد وينزلوا يلفّوا فيها ويبقوا زاروا بلد جديدة.
عشان تتفرج على كل عروض الطيران المُتاحة عندك مواقع كتير جدًا تقدر تتفرج وتحجز كمان تذكرة طيرانك من وانت فى بيتك، من اشهرهم طبعًا سكاى سكانر، اللى كُنا كتبنالكم مقالة مخصوص نشرحلكم فيها ازاى تستخدموا سكاى سكانر وازاى تحجزوا من خلاله ارخص تذكرة طيران ممكنة!
تقدروا تلاقوا المقالة الخاصة بسكاى سكانر فى مقالتنا ازاى تسافر لوحدك فى قسم حكاوى السفر..
طلّعت تأشيرتك، حجزت طيّرتك، تعالى بقى خد فكرة عامة عن سريلانكا قبل ماتخُش عالمُدن.
دول اهم عشر معلومات يخصّوا سريلانكا، حطّهم حلقة فى ودانك وجوه ننى عينيك، رغم انها معلومات بسيطة الا انها هتساعدك كتير تستمتع بسفريتك.
1- مفيش حشرات كتير فسريلانكا، عشان الناس اللى بتوسوس من آسيا عشان فيها حشرات كتير، سريلانكا هادية فى النقطة ديه ولو حجزت اماكن اقامة كويسة ممكن تقضى سفريتك كلها من غير ماتشوف حشرة واحدة.
2- عملة سريلانكا اسمها روبى والدولار ب 300 روبى تقريبًا، ومتوسط سعر الوجبة هناك فى المطاعم الشعبية فى حدود 5 دولار، من اشهر المواقع اللى ممكن يحوّلك بين اى عملتين فى العالم هو XE، اما موقع Numbeo فهو من اكبر المواقع اللى ممكن تعرّفك تكاليف المعيشة فى اى حتة فى العالم.
3- البلد امان جدًا جدًا جدًا، طبعًا انت كدة كدة لازم تبقى حريص وعينك وسط راسك طول الوقت، بس احب اطمّنك ان البلد أمان وشعبها مسالم ومش هتحس بخوف او قلق وانت هناك.
4- وانت فسريلانكا ابقى فاصل ف اى حاجة وكل حاجة، البلد فقيرة وأهلها بيعتمدوا عالسياحة، وانت بالنسبالهم سايح متريّش جاى يصرف، فطبيعى تلاقى البيّاعين والسوّاقين بيعلّوا عليك السعر، فخليك ناصح وطلّع شخصية المصرى الاصيل اللى جوّاك واتعلّم حاجة من ماما بقى!
يقولك 1000 روبى ادّيله واحدة همّ 150 وهاخُد المادلية ديه هدية فوق البيعة!
5- سريلانكا محتاجة عالاقل اسبوع عشان تلحق تشوف كل حاجة فيها،فحتى لو سريلانكا جزء من رحلة كبيرة بترتبها فى آسيا فبرضه متديهاش اقل من اسبوع عشان هتبقى بتظلمها.
6- احسن وقت لزيارة سريلانكا هو من نوڤمبر لمايو، ده موسم توقّف المطر والموسم السياحى فى سريلانكا، وبرضه استخدم موقع Accuweather واللى بيعرّفك الجو ف اى بلد ف اى وقت فالسنة.
7- الاكل السريلانكى حلو جدًا، وفيه هناك بيتزا هات وكنتاكى وبرجر كنج وكل حاجة ف ماتشيلش هم الاكل. فيه مطاعم ومنتجات كتيرة حلال ف برضه اتطمن من الموضوع ده، اشهر وجبتين عندهم اسمهم الكوتو والروتى ولاااازم تجرّب الاتنين.
8- سريلانكا مش مناسبة اوى للاطفال الاقل من 4 سنين، وده لأن سريلانكا فيها مغامرات كتيرة احيانًا فعلًا بتبقى فيها نسبة خطورة مش قليلة.
فيُفضّل انك ماتسافرش سريلانكا ومعاك اطفال، إلا لو قلبهم جامد طبعًا!
9- سريلانكا فيها اربع اديان، هندوسية وبوذية وإسلام ومسيحية، والناس كلها عايشين فى سلام جميل، وتنوّع الاديان ده هيدّيلك فرصة حلوة تسمع قصص وحكاوى مختلفة وغريبة عنّك، وانا هناك مثلًا كانت اول مرة اعرف ان البوذيين بيعتقدوا ان بوذا عاش 555 حياة مختلفة!!، وعرفت حاجات تانى كتييير..
10- سريلانكا ليها لغة خاصة بيها، شبه الهندى شوية كدة، هُم اصلًا شبه الهنود فى الشكل واللبس والعادات وكل حاجة، بس المُميّز بقى فى موضوع اللغة ده هو ان كتير من السريلانكيين بيعرفوا يتكلموا انجليزى كويس، وبالذات اللى بيشتغلوا فى مجال السياحة، وده هيخليك تعرف تتعامل بسهولة فى المطاعم والمحلات وحتى المواصلات.
طب ايه اهم مُدن فى سريلانكا؟ واقعد كام يوم فى كل مدينة؟ وترتيب المدن هيكون ايه؟
بصّوا ياملوك، سريلانكا ديه كلّها على بعضها كدة عبارة عن جزيرة فى المحيط الهندى تحت الهند على طول، زمان كان اسمها سيلان واتنفى ليها عمّنا احمد عرابى، وفيه متحف بإسمه موجود هناك على فكرة فى مدينة اسمها كاندى.
اما عاصمتها بقى اسمها كولومبو، وفيها المطار الاكبر فى سريلانكا – مطار كولومبو الدولى، كولومبو باندرانك Bandaranaike والرمز بتاعه CMB.
المطار صغير ميتوّهش، هيسألك عالتأشيرة وممكن يطلب يبص على حجز فندق، خلّيك طابع ورقة حجز الفندق وواخدها معاك للاحتياط، وقبل ماتطلع مالمطار ابقى حوّل عملة من جوه المطار، وابقى اشترى خط ديالوج برضه هتلاقيلهم مكتب جوه المطار، وحط عليه باقة نت، سعر الخط بالنت مش هيكمّل 300 جنيه على بعض.
كولومبو بقى كمدينة زحمة ومش حلوة، مافيهاش غير شوية شوبينج ومش حلوين اوى برضه، لو عايز تستفيد بوقتك ف اوصل المطار وسيب كولومبو على طول، اما لو راجع تعبان او وصلت فى وقت متأخر فممكن تقضى ليلة واحدة عشان تريّح مالسفر وتنطلق تانى يوم، وساعتها اقضى الليلة ديه فى ضاحية اسمها نيجومبو، ديه الضاحية اللى فيها المطار وموجودة فى طرف كولومبو الشمالى، الاجواء هناك لطيفة واجمل من المناطق اللى فى قلب كولومبو.
طيب نطلع من مطار كولومبو على فين؟
مدن سريلانكا تعتبر نوعين، النوع الاول هو المدن الداخلية مش عالبحر، ديه بتبقى فى قلب البلد، وديه اللى فيها الجبال والشلالات والديسك توبات والمغامرات، اما النوع التانى فهو المدن الساحلية، وديه اللى بيبقى فيها الشواطئ والمحيطات والانتخة والحفلات وترييح الفخاد.
اغلب الناس اللى بتسافر سريلانكا – والرحلات اللى احنا بنرتبها بنعمل كدة برضه – بنبدأ بالمدن الداخلية عشان هى الاهم ونختم بقى بيومين تلاتة دلع عالبحر نودّع فيهم البلد، وبكدة هتلاقى نفسك مشيت فى مسار شبه دائرى لحد مارجعت المطار تانى، برضه تقدر تمشى الدايرة ديه بالعكس وفيه ناس بتعمل كدة بس قليلين، انما لو افترضنا انك هتعمل زى اغلبية السياح وهتبدأ بالمدن الداخلية، يبقى ركّز فى الكلام اللى جاى عشان هنقولك دلوقتى احلى المدن بأفضل ترتيب حسب الخريطة، بعدد الايام اللى تقضيه فى كل مدينة واشهر الانشطة وانسب اماكن الاقامة، وكل ده بالاسعار يامعلّم!
المحطة الاولى – كيتولجالا – اقوى انشطة مائية فى سريلانكا! | يوم واحد |
كيتولجالا مدينة صغيرة ومش معروفة جدًا، مافيهاش مطاعم وكافيهات وكدة، الناس بتروحها عشان المغامرات المائية اللى اشهرها الـ rafting، وده لاااازم تعمله، متوسّط سعره فى حدود 20 دولار، مدته بتبقى فى حدود 45 دقيقة تجديف فالنهر، مغامرة مش هتتنسى وناس كتير من اللى سافروا معانا رأيهم هى ان ديه امتع مغامرة فسريلانكا كُلّها!
وعندك كمان الـ Canyoning وسعره نفس سعر الرافتنج، بس ده محتاج قلب اجمد، 45 دقيقة برضه بس ميكس بين المشى فالغابة والنط فالنهر والزحلقة عالصخور والعوم، بتبقى مغامرة برضه متتنسيش.
المحطة التانية : Kandy – جرّب الاسواق الشعبية وعيش الـLocal life | يومين |
كاندى تانى اكبر مدينة فى سريلانكا بعد كولومبو من حيث عدد السكّان، هناك بقى هتشوف الحياة بشكلها الطبيعى وهتشوف الاسواق الشعبية وهتجرّب الشوارع والاكل والمحلّات الشعبية، فهتعيش تجربة بنعتبرها احيانًا اهم تجربة الواحد بيرجع بيها من السفر..
وانت فى الطريق بين كيتولجالا وكاندى لاااازم تعدّى على برج Ambulawawa!
وده عبارة عن مجمّع اديان، فيه جامع وكنيسة ومعبد بوذى ومعبد هندوسى، البرج الرئيسى هو المعبد البوذى وطلوعه صعب وهيخلّى الادرينالين يفرتك عروقك، لو عندك مشكلة مع المرتفعات خليك حريص جدًا لو سمحت، المفروض انه واخد الشكل ده عشان يعكس ان اكل الاديان بتشاور على الله.
بيقال ان تم تسميته امبولاواوا نسبة الى الامبول، تذكرة فى حدود 900 روبية والتكتك اللى هيوصّلك من البوابة لبداية البرج هياخد 1500 روبية.
اما بالنسبة لكاندى نفسها فأشهر حاجة هناك واللى تعتبر قلب المدينة هى بحيرة كبيرة اسمها Kandy Lake وديه اللى حواليها الشوارع الزحمة والاسواق والمحلات والمطاعم، هناك هتلاقى كمان اماكن شوبينج معقولة اشهرهم سوق اسمه الـlocal market ممكن تشترى منه هدايا ولبس وزيوت شعر وحاجات تانى كتير..
كمان فيه فكاندى منطقتين عاليين اوى كاشفين المدينة كلّها، اسمهم Kandy view point 1 & 2 ، روح اى واحدة منهم هتشوف ڤيو حلو للمدينة وهتتصور صور حلوة.
كمان كاندى فيها اكبر معبد بوذى فى سريلانكا كلّها واسمه Temple of scared tooth واللى موجود فيه ضرس بوذا وياما سيّاح بييجوا كاندى مخصوص عشان يدخلوا المعبد ده.
المعبد موجود على بحيرة كاندى مباشرة ولو رُحت بشورت مش هيدخّلوك لازم تستر نفسك.
كمان عندك فى كاندى واحدة من اكبر حدائق سريلانكا وهىّ الBotanical gardens واللى فيها اكتر من 1000 نوع نبات مختلف، الصور هناك بتكون جميلة وسعر تذكرة الدخول للسائح بتبقى فى حدود 10 دولار.
آخر حاجة فى كاندى واللى ناس كتير احيانًا بتروح كاندى مخصوص عشانها برضه هى pinnawala elephant orphanage وديه عبارة عن حديقة كبيرة مليانة افيال اعمارها مختلفة.
هناك بيبقى عندك فرصة تلعب مع الافيال وتحمّيهم وتتصور معاهم، لكن للاسف احيانًا ناس بتروح ومش بتنبسط لأن اللى شغالين فى المحمية ديه كتير بيعاملوا الافيال معاملة قاسية وبيضربوهم او كدة، ف بيرجعوا بإنطباع سخيف عن المكان، تذكرة الدخول بتبقى فى حدود 20 دولار للسُياح.
المحطة التالتة : Nuwara Elyia – انت ايه اللى ودّاك انجلترا! | يومين |
المدينة ديه من أروق مُدن سريلانكا، بيسمّوها little England وده عشان المدينة كلها مبنية على الطراز الانجليزى، اول ماتوصل هتحس نفسك دخلت حتة من انجلترا.
لما توصل نوارا ايليا بقى نفسها اول حاجة تجربها هى انك تزور مصنع شاى، زى مصنع شاى Damro اللى يعتبر من امبر واشهر مصانع ومزارع الشاى فى سريلانكا كلّها، بتبقى زيارة لطيفة بتتفرج فيها على مزارع الشاى وتتصور صور حلوة وتشوف الشاى وهو بيتصنع وتشرب شاى ببلاش، ولو عجبك تقدر تشترى كمان، السعر غالى شوية فى دامرو بس الكواليتى عالية.
وكمان فوت على Gregory lake، وديه بحيرة رايقة جدًا، التمشية عليها حلوة والصور كمان جميلة، ممكن كمان تأجر عجل هناك، وفيه مطعم هندى عالبحيرة ديه حلو جدًا ابقى اتغدوا فيه هتنبسطوا خالص.
واخيرًا شلال Lover’s leaps وده يعتبر واحد من اجمل الشلالات فى سريلانكا، اتسلقه لحد القمة هتنبسط جدًا بالمغامرة والڤيو، مغامرة مش سهلة ومحتاجة اعصاب ناشفة وقلب جامد، بس زيارة الشلال ده هى تجربة لازم تخوضها لو رحت نوارا ايليا.
كمان من اكبر مميزات نوارا ايليا هو ان فيها اماكن كويسة للشوبينج، الهدوم تحديدًا.
هى مش وااو، بس هتلاقى لبس كويس يكفى عالاقل انك ترجع بيه كذكرى من البلد، وتحديدًا اللبس الشتوى اللى موجود فى كل المحلات اللى فالشوارع وموجود كمان فى مول صغير كدة هناك بس مشهور اوى اسمه بالى بازار.
المحطة الرابعة : Ella – نهاية العالم! | من يومين لـ3 ايام |
بيسمّوها كدة.. The end of the world، وده عشان المدينة ديه معزولة عن باقى المُدن، غير انها صغيرة جدًا “المدينة كُلها عبارة عن شارعين كُبار” وهتاخُد 3 ساعات تقريبًا على ماتوصلّها من نوارا ايليا.
اهم انشطة فى ايلا بتبدأ من رحلة القطر اللى هتروح بيه ايلا، القطر اللى من نوارا ايليا ل ايلا ده انت هتعيش فيه اجمل وقت فى حياتك!، الرحلة بتبقى وهمية والقطر هيعدّى بيك فوق الجبال وجوه السحاب حرفيًا!!، كل الصور اللى انت شوفتها لناس متصورين على باب قطر فسريلانكا دول كانوا فى الرحلة ديه.
تانى حاجة مهمة فى إيلا هى الناين ارك بريدچ، وده من اشهر الجسور فى سريلانكا واكيد برضه شوفتوله صور كتير، المنظر هناك حلو جدًا ولازم تروح وتتصور هناك.
بعد كدة عندك واحد من اهم وشهر الجبال فى ايلا وسريلانكا كلّها، جبل ليتل ادامز بيك little Adam’s peak، ويعتبر واحد من اجمل الجبال اللى هتطلعها فحياتك، طلوعه مش صعب اوى، خمسة واربعين دقيقة تقريبًا.. الڤيو من فوق تحفة وعبارة عن 3 قمم متّصلين، هتستمتع جدًا وتاخد احلى صور وڤيديوهات..
اثناء طلوعك little Adam’s هاتلاقى سنتر الزيب لاين اللى فيه تقدر تجرب العاب كتيرة ممتعة جدا زى الزيبلاين والابسيلنج والبيتش باجى واسعارها كلها معقولة 20 ل 30 دولار، اشهر حاجة فيهم هى الزيبلاين ولو رُحت ومجربتوش هتخسر كتيييير.
وبرضه من اشهر معالم إيلا هى Ella Rock ، وديه عشان توصلّها هتحتاج تطلع جبل طلوعه هياخد منك بتاع ساعتين كدة، كلّهم اكشن ومغامرات وفرهضة، بس مننصحكش تطلع لوحدك لأنك ممكن تتوه وتلاقى نفسك وصلت اماكن فيها تعابين وافاعى، زى ماحصل لواحد صاحبنا انت ماتعرفوش، عشان كدة لما تقرر تطلع صخرة إيلا ابقى استعين بـguide يطلع معاك، المبلغ اللى هياخده بيختلف حسب عدد الناس اللى هيطلعوا معاه بس وجود guide معاك شيء ضرورى ولابد منه.
كمان ماتنساش تعدى على Ravana infinity pool عشان تاخد وقت هادى ورايق فى الpool على احلى ڤيو فى الدنيا، وهناك برضه ممكن تجرب السوينج المشهورة اللى هتطلع منها بأحلى صور وڤيديوهات..
اما آخر حاجة فى إيلا هو شلّال راڤانا ووترفول Ravana waterfall، وده شلال حلو جدًا بس مافيهوش تسلّق، بتقف تتفرج عليه من قدام عادى كدة، لو فكّرت تتسلق ممكن تبقى الشخص رقم 37 اللى هيموت هناك، لان الصخور هناك مزحلقة جدًا، ده غير انهم ممكن يطلبولكم البوليس زى ماحصل معانا قبل كدة.
كمان فيه كافيه مشهور جدًا اسمه Chill Cafe ، يعنى أروق جو كافيه ممكن تقعد فيه فى حياتك!
غير مطعم Raha اللى هتاكل فيه احلى اكل سريلانكى..
اخيرًا نحب نقولك لما تروح Ella انك ممكن تقعد فى الهوستيل بتاعنا، 4Travellers Hostel، هتنورنا وتشرفنا واعتبر البيت بيتك..
خلّصنا المُدن الداخلية والمغامرات، نلبس المايوه بقى؟!
استنوا قبل ماتلبسوا المايوه!، فيه مدينة كمان داخلية احنا لسه ماقُلناش عليها، اسمها Sigirya وتعتبر مشهورة نسبيًا.
احنا مارُحنهاش قبل كدة لإننا بنشوف ان مفيهاش حاجة مشهورة غير Sigirya Rock وديه صخرة كبيرة الڤيو من عليها بيكون رهيب، بس مش مميّزة بحاجة مختلفة، غير ان تذاكر دخولها ب30 دولار للفرد تقريبًا، كمان المدينة نفسها بعيدة عن المسار الدائرى المشهور، عشان كدة احنا ماروحنهاش قبل كدة، بس لو حد فيكم راحها او هيروحها ياريت يشاركنا بتجربته هناك يمكن نغيّر رأينا المرة الجاية ونقرر نجرّبها.
هيّا بنا نأنتخ!
نخش بقى عالمدن الساحلية، سريلانكا فيها مُدن ساحلية كتير موجودة عالساحل الجنوبى للبلد، مفيش اختلافات كتير بين المُدن وبعضها، العامل المشترك بينهم كلّهم هو الشواطئ والانتخة، انا هحكيلك دلوقتى على اشهر 3 مدن عالساحل وانت اختار منهم اللى يناسبك، وبالنسبة لعدد الايام فمن يومين لاربع ايام كتوتال ايام فالمدن الساحلية هيكونوا كافيين جدًا عشان الموضوع ميقلبش بملل، قسّمهم انت بقى عالمدن بمزاجك.
المحطة الساحلية الاولى : Mirrissa – المدينة اللى هتاخد قلبك!
ديه المدينة الساحلية المفضّلة بالنسبالنا، تعتبر اكبر مدينة ساحلية واكتر مدينة فيها انشطة.
اول ماتوصل ميريسا هتنسى الدنيا فيها، المدينة صغيرة وهادية ورايقة وتحس ان ممنوع دخول اى صوت عالى او دوشة او نكد.
الشاطئ العام فى ميريسا Mirrissa Beach يعتبر اجمل وأروق شط فى ميريسا، تقدر تستمتع بالشط ده بطريقتين مختلفتين، اولا انك تقعد فى اى كافيه من اللى على البحر، ساعتها هتاخد شيزلونج وشمسية على البحر بس طبعا لازم تطلب حاجة، بس الحلو ان الكافيهات هناك رخيصة سواء فالاكل او الشرب، او ممكن تلجأ للاوبشن التانى واللى معظم الاجانب هناك بيعملوه، انك تفرش الفوطة بتاعتك على الرملة وتحط عليها حاجتك وتأنتخ وتنسى العالم باللى فيه.
نفس الشاطئ ده ده بالكافيتيريات اللى عليه بتلاقيها من اول الغروب كدة بدأت تفرش شوادر السمك بتاعتها، وهنا بقى تقدر تدّيها اكلة سمك رايقة وسعرها فالحنيّن، وبالليل برضه المافيهات ديه بتفضل مفتوحة وبتقدم مشاريب وتشغل مزيكا ومنهم اللى بيعمل حفلات كمان، يعنى انت تقدر تقضى يومين تلاتة فى ميريسا بيتش متخرجش منه لو انت عايز، وجنب شط ميريسا على طول هتلاقى تبّة كدة اسمها coconut tree hill، ابقى عدّى عليها برضه الصور هناك بتبقى جميلة ورايقة.
وعندك شاطئ تانى مش معروف اوى اسمه the secret beach واعتقد انت كدة عرفت ليه هو مش معروف اوى، الوصول ليه هياخد بتاع 20 دقيقة تمشية فى حتت عجيبة كدة وفالاخر هتلاقى نفسك وصلت لشط محدوف ومعزول وهادى ووسط الغابة والناس اللى فيه قليلين، جرّب تروحله لو غاوى الاماكن المعزولة اللى مش معروفة.
كمان عندك الانشطة البحرية بقى واللى ممكن تختار منها اللى يناسبك، اشهرهم مثلًا هى رحلات مشاهدة الحيتان whale watching ، هتكلّفك فى حدود خمسين دولار ومدتها 5 ساعات بياخدك فى مركب فى قلب المحيط وبتتفرج عالحيتان من حواليك، او ممكن تاخد كورس Surfing واللى بيبقى رخيص – فى حدود 2000 روبية – وبيبقى معاك زى مدرب لمدة ساعتين تقريبًا يعلّمك ركوب الامواج وبتبقى تجربة لطيفة.
وبالليل هتلاقى كافيهات بتعمل حفلات عالبحر، كافيهات جايبة باندات، اماكن شوبينج فى منطقة اسمها ماتارا بينها وبين الشط ربع ساعة بالباص تقريبًا، وفيه كمان كافيه اسمه the Doctor’s house كتير بيعمل حفلات رايقة جدًا..
بالنسبة للمطاعم فعندك مطعم اكل سريلانكى نضيف وجميل اسمه the big belly هتلاقيه قريب من شاطئ ميريسا.
المحطة الساحلية التانية : Galle – ايه اللى جاب البرتغال فى سريلانكا؟
هى بتتكتب جالى، بس بتتنطق جوول، جوول بقى مدينة رايقة، برضه فيها شواطئ كتير حلوة وبرضه من ضمنهم شط عمومى اسمه Unawatuna beach فيه نفس مواصفات شط ميريسا بس الفرق ان شاطئ ميريسا اروش شوية، ميريسا عموما سياحية اكتر من جوول، لكن جوول فيها حتت شعبية واسواق لوكال مش موجودة فى ميريسا.
اشهر حاجة هنا Galle Fort، وديه قلعة بحرية كبيرة عالطراز الاوروبى وتحديدًا البرتغالى، التمشية والصور فيها بيبقوا حلوين جدً، هتحتاج كذا ساعة عشان تلف كل المطاعم والكافيهات والمحلات اللى جوه القلعة، غير الصور الحلوة اللى هتتصورها عند السور، وكمان منظر الغروب فوق سور القلعة بيبقى تحفة حقيقى.
جوول كمان فيها الدريم كابانا سوينج، المرجيحة اللى مربوطة فى نخلة عالبحر، هتلاقيها منتشرة فى شواطئ كتير هناك، منهم واحد مثلا قدام كافيه اسمه دريم كابانا، روح وخد صور حلوة واستمتع بالطيراااان
ماتنساش وانت فى جوول تعدّى عاللوكال ماركيت اللى فيه هتلاقى شاى وأعشاب وهدوم وشنط ومصنوعات جلدية كتير، يمكن الجودة مش هتبقى احسن حاجة عشان ده سوق شعبى، بس السعر دايمًا هايبقى كويس ومتتساش انك تفاصل فى كل حاجة للنص.
المحطة الساحلية التالتة : Bentota – ماتيجوا نطير بجد!
بنتوتة مدينة ساحلية جميلة وهى الاقرب للمطار عشان كدة ناس كتير بتفضّل تقضى فيها اخر يومين بحيث ميبقوششايلين هم مشوار المطار، كالعادة فيها شاطئ عام مجّانى وميّته حلوة، وكمان فيه هناك لاجوونا بيتعمل فيها انشطة مائية كتير زى الچيت سكى والبانانا بوت وغيره.
لكن اهم حاجة موجودة فى بنتوتة ومش موجوده فى اى مكان تانى فى سريلانكا كلّها هى الباراموترنج!
الباراموترنج تقدر تشبّهه انه موتوسيكل بيطير، ربع ساعة بقى طيران تتفرج فيهم على المدينة كلها من فوق، بتبقى تجربة حلوة ومختلفة وجديدة، سعر الاكتيڤتى غالى شوية، من 40 ل 60 دولار حسب العدد والسيزون، بس كل الناس اللى جرّبوه قالوا انه يستاهل المبلغ ده وزيادة!
المواصلات بقى.. قطر ولا اتوبيس ولا تاكسى ولا ايه؟
كدة انت عرفت كل المدن المشهورة فسريلانكا وعدد الايام المناسب لكل مدينة، مش ناقص بس غير انك تعرف ازاى هتتحرك بين المدن ديه وديه عندك فيها حلّين مالهمش تالت، اما المواصلات العامة وإما تأجر عربية خاصة تبقى معاك طول الرحلة، انا دلوقتى هقول الاتنين بالتفصيل وانت اختار اللى يناسبك منهم حسب ميزانيتك وحسب انتوا كام واحد.
الاختيار الاول – المواصلات العامة
المواصلات العامة فى سريلانكا مش مريحة خالص للاسف، رغم وجود شبكة اتوبيسات وقطارات كبيرة ورخيصة ومغطيّة معظم المدن، الا انها مش مريحة خااااالص وفى اوقات كتير بتبقى خطرة كمان لأن سواقين الاتوبيات هناك بياخدوا دريفتات على حافة جبال بشكل كان بيوقعلنا قلوبنا حرفيًا، غير كمان ان مواعيدها مش كتيرة اوى، بس طبعًا هى اختيار ارخص وفيه ميزة كمان انك عن طريقها بتبقى اتعامل فى البلد بطريقة السكان الاصليين مش السيّاح، وده بيبقى واحد من امتع الحاجات اللى بنرجع بيها من اى سفرية.
نصايحنا فى المواصلات العامة هتبقى كالآتى : هتطلع من المطار تلاقى اتوبيس اسمه 187 اكسبريس واقف فى وش باب المطار، هياخدك من المطار لحد كولومبو فورت – اكبر محطة قطر واتوبيس فى كولومبو.. ومن هناك ابدأ بقى سواء بالقطر او بالاتوبيس للمدينة اللى تحبها..
لو هتمشى حسب الدايرة اللى احنا رسمناها فوق ف ممكن تاخد اتوبيس من كولومبو فورت لكيتولجالا وهياخد ساعتين تقريبًا، هتلاقى مكتوب على كل اتوبيس اسم المدينة اللى هو رايحها.
من كيتولجالا لكاندى برضه الاتوبيس هيبقى افضل اختيار، وبرضه هياخد ساعتين تقريبًا.
اما من كاندى لنوارا ايليا ف ممكن القطر او الاتوبيس، الاتنين كويسين، والمسافة هتاخد فى حدود 3 ساعات.
من نوارا ايليا ل ايلا لااااازم تاخد القطر لان ديه الرحلة الوهمية اللى حكيتلكم عنها، تذاكر القطر للرحلة ديه جايز ماتلاقيهاش بسهولة بس ممكن تجيبها سوق سودا اغلى شوية من ناس بيبقوا واقفين قدام المحطة، لو قفلت خالص ابقى اطلع عالمحطة على طول واشترى تذاكر وقوف من غير كراسى، كدة كدة حتى لو معاك كرسى فانت هتسيبه وتفضل واقف عالباب طول ال3 ساعات من حلاوة المنظر.
اما من ايلا لميريسا او لأى مدينة ساحلية تانية، الاتوبيس هو الاختيار الوحيد.
الاختيار التانى – لو الميزانية تسمح اجّر عربية بسوّاق
لو هتأجر عربية تبقى معاك من لحظة وصولك المطار لحد ماترجع ده هايبقى حل مكلّف شوية بس هيوفّر عليك وقت ومجهود كتير، وخصوصًا لو انتوا 3 صحاب او اربعة، لان ساعتها الفلوس هتتقسم عليكوا ف فرق السعر هايبقى بسيط مقارنة بحجم الوقت والمجهود والبهدلة اللى هتبذلوها.
لو محتاج عربية بسوّاق ممكن تستعين بأى شركة سياحة سريلانكية، احنا بنرشّح شركة مميّزة جدًا واسعارها حلوة وخدمتها ممتازة، الويب سايت بتاعهم اسمه Merki Tours ورقم الواتس اب الخاص بيهم هو 0094768717537 والمالك اسمه ماهيش وده لو قولتوله انكم من طرفنا احنا ضامنين انه هيقدم افضل مستوى خدمة بأحسن سعر
كمان تقدر تعتمد على السواق اللى هايبقى معاك ده فى اى تفاصيل صغيرة هو هايبقى عارفها، معرفة مواعيد المزارات، مطاعم وكافيهات ومحلات لوكال، حاجة محتاج تعبّر عنها بالسريلانكى، وأى تفاصيل تانية.
كمان حتى لو هتاخد عربية بسوّاق ده ميخلّكش تستغنى عن رحلة القطر بتاعة ايلا، خلى السواق يودّيك المحطة ويروح يستناك بالعربية الناحية التانية.
وبكدة تبقى عرفت كل حاجة تخص سريلانكا من طقطق لسلامه عليكوا..
حُب السفر ياخوانّا.. حُب السفر!
دايمًا هو الدافع الاكبر اللى بيخلّينا نحمّس كل الناس انهم يتشجعوا ويسافروا!
عشان كدة لو عندك اى سؤال اوعى تتردد انك تتواصل معانا وتسألنا، هتلاقينا دايمًا بنرُد عليك فى اسرع وقت ممكن
تعيشوا وتسافروا يابهوات.
