السفر الى فرنسا هو حلم لناس كتيرة جدًا من كل حتة فى العالم، فرنسا بتعتبر من اكبر دول اوروبا واعرقها، عاصمة الموضة والازياء والرومانسية وفى نفس الوقت اسعار تذاكر الطيران الى فرنسا مش غالية اوى وفى متناول ناس كتير، يمكن ڤيزا شنجن لفرنسا هى اللى تعتبر صعبة شوية، لكن لو ظبطت ورقك كويس هتقدر تاخد تأشيرة فرنسا بسهولة.
فى المقالة ديه هنتكلم عن كل حاجة بالتفصيل، ازاى تستخرج تاشيرة شنجن (فرنسا) للمصريين، افضل وقت فى السنة لزيارة فرنسا، ازاى تحجز طيران وفنادق بأرخص سعر ممكن، ايه اشهر واهم المدن السياحية فى باريس وازاى تزورهم كلّهم، وكمان اشهر المعالم السياحية فى باريس وفى باقى المدن، غير بقى شوية نصايح كدة هتساعدك انك توفّر فى تكاليف السفرية كلّها، تعالوا نمسك حاجة حاجة ونبدأ بتأشيرة شنجن (فرنسا) للمصريين :
التأشيرة – ظبّط ورقك وخش استلم تأشيرتك بقلب جامد!
تأشيرة فرنسا تعتبر صعبة شوية لكتير من المصريين وده بسبب انها بتتطلب ورق كتير شوية ولازم الورق يكون مظبوط ومنطقى ومقنع للسفارة عشان يسمحولك انك تسافر، ممكن تقدّم عليها عن طريق مكتب TLS Contact Center فى القاهرة واللى بدوره بيوصل كل الورق اللى بتقدمه للسفارة الفرنسية وهنتكلم بالتفصيل عن ازاى تجهز ورقك وتحجز ميعاد تقدم فيه الورق بتاعك.
التأشيرة بتحتاج شوية ورق بتحتاج تطلعه من كذا مكان و بيكون الهدف الاساسى من كل الاوراق ديه هو انهم يقتنعوا انك مستقر فى بلدك ومفيش عندك اى نوايا انك تكون عايز تسافر وتخلع وماترجعش، الاوراق المطلوبة واضحة وبسيطة ولو نفذتها بالظبط هتاخد التأشيرة ان شاء الله، لكن فى نفس الوقت الموضوع فيه تفاصيل كتيرة وتكّات لازم تاخد بالك منها، عشان كدة عملنالكم مقالة مستقلة هتلاقوا فيها كل التفاصيل اللى ممكن تخطر على بالكم، اعرف الورق المطلوب، اسباب رفض التأشيرة، حتى فكرة انك ممكن يرجعوك من المطار هناك بعد ماتوصل لو شكوا فيك حتى وانت معاك الفيزا! ، كل ده فى المقالة الخاصة بتاشيرة فرنسا للمصريين وهتلاقيها فى قسم التأشيرات والاوراق.
طيب بعد مانطلّع التأشيرة، نحجز طيران وفنادق منين؟
هتلاقى “مصر للطيران” و “اير فرانس” بيعملوا رحلات يوميًا، ف هتلاقى مواعيد الصبح ومواعيد بالليل وبأسعار مختلفة.
اطلع من مطار القاهرة وروح على مطار شارل ديجول، فى الغالب دى بتكون ارخص رحلة الا لو لاقيت رحلات ارخص من كدة من مطار الغردقة اللى بتكون بشنط اقل من مصر للطيران او اير فرانس وطبعا تقدر تعرف وقتها اسعار التذاكر من على SkyScanner وتجيب من عليه ارخص سعر تذكرة والمواعيد وتحجزها فى خمس دقايق وحط فى اعتبارك ان السفر من القاهرة لمطار شارل ديجول على خطوط مصر للطيران او اير فرانس بتكون دايركت من غير ترانزيت والرحلة بتاخد 4 ساعات ونص تقريبًا.
بالنسبة لأماكن الاقامة فى باريس فأنت تقدر تتفرج على كل الاماكن اللى ممكن تقعد فيها فى باريس او اى مدينة تانى، بداية من الهوستلز البسيطة لحد الفندق الخمس نجوم، عن طريق موقع booking ، اللى هيعرضلك كل الاماكن بأسعارها ومواقعها ورأى الناس فيها كمان..
لو مسبقش ليك استخدام Skyscanner او Booking قبل كدة ف احب اطمّنك ان الموضوع فى غاية البساطة، ممكن تبص على مقالة ازاى تسافر لوحدك فى قسم الحكاوى العامة، واللى هتلاقى فيها شرح كامل وبسيط عن ازاى تستخدم الموقعين دول بحيث تجيب ارخص سعر طيران وافضل مكان للاقامة.
حجزنا طيران وطلّعنا تأشيرة، نخش على باريس بقى!
مبدأيًا احسن وقت لزيارة فرنسا بيبقى وقت الصيف الجو بيكون لطيف من شهر يونيو لحد شهر سبتمبر كدة، و ممكن فترة الكريسماس فى اخر السنة من شهر ديسمبر كدة و يناير بس حط فى اعتبارك ان الجو بيكون بارد جدا فى الوقت ده لكن الاجواء الاحتفالية ممتعة وجميلة بسبب فترة الكريسماس ورأس السنة وتحب تشوف البلد هناك وتعيش الاجواء دى.
فرنسا تعتبر من اكبر الدول فى اوروبا، بتطل على البحر المتوسط من ناحية، وعلى المحيط الاطلنطى من الناحية التانية.
باريس طبعا هى العاصمة وكمان هى اشهر مدينة سياحية فى فرنسا ويمكن هى الاشهر فى العالم كله كمان مش فى فرنسا بس، باريس موجودة فى شمال فرنسا ومش بتطل على اى سواحل لكنها مدينة مش صغيرة وفيها شبكة مواصلات كبيرة وقوية جدا تقدر تتحرك بيها جوّا باريس بسهولة، او من باريس لأى مدينة تانية، طبعًا ده غير المعالم السياحية الكتير جدا والانشطة المتنوعة اللى ممكن تعملها وانت هناك، علشان كدة باريس هى اهم واول الوجهات لأى حد مسافر فرنسا.
لو سافرت من القاهرة على مطار شارل ديجول ف وانت طالع خد شنطتك وخلّص اجراءاتك وبعدها مش هتلاقى باب تخرج منه، انما هتلاقى اسانسير يطلعك من الحتة اللى انت فيها على قطر، اللى بدوره هيوصلك لمحطة المترو اللى منها هتتحرك على المكان اللى انت قاعد فيه، ديه اسهل وسيلة مواصلات وطبعا الجى بى اس هيظبطك فى الموضوع دهوهيقولك تركب ايه وبالمواعيد وبكل التفاصيل وحاول تجيب خط تليفون (لايكا) من المطار وهيشتغل معاك نت فى كل دول اوروبا، وانت فى المترو بتقدر تشترى تذكرة تشتغل معاك ساعتين او يوم او يومين على بقى حسب استخدامك للمترو والبرنامج بتاعك.
تعالوا بقى خدوا زيتونة باريس من طأطأ لسلامه عليكوا..
باريس من اكبر واعرق المدن الاوروبية، واماكن الزيارة فيها كتيرة، رغم انها زحمة الا ان الحركة فيها مش صعبة خالص لأن فيها شبكة مواصلات ضخمة ومنها المترو اللى عبارة عن 14 خط متصلين ببعض ف ماتشيلش هم الحركة خالص.
بالنسبة لأماكن الاقامة ف هى متنوعة طبعًا وبتبدأ من 10 يورو ل 1000 يورو فى الليلة، بس لو انت low budget traveller زى حالتنا ف فيه هوستيل احنا جرّبناه بنفسنا لما كُنا هناك وعجبنا جدًا، اسمه Les Piaules , st. Christopher’s Inn canal وهو من احلى الهوستيلز فى باريس.
طيب ايه اهم الاماكن اللى لازم تزورها وانت فى باريس؟
برج ايفيل : وطبعا ده غنى عن التعريف وبيروحله ملايين من الناس كل سنة من كل مكان فى العالم علشان بس يتصوروا معاه.
قوس النصر : من اشهر المعالم التاريخية فى باريس والتصميم بتاعه شكله جميل وملفت وهتلاقيه من اكتر الحاجات اللى الناس بتتصور جنبها بعد برج ايفل كدة وطبعا برضه تقدر تدخله للزيارة لو حابب
كنيسة القلب المقدس : وهى كنيسة اثرية عريقة تصميمها المعمارى رائع وموجودة فى مكان عالى تقدر منه تشوف مشهد بانورامى لباريس كلّها.
متحف اللوفر : من اشهر متاحف العالم وبيحتوى على اثار كتير جدا ولوحات فنية مشهورة زى لوحة الموناليزا طبعًا، ده غير ان تصميم المتحف نفسه حلو ومبهر جدًا.
ديزنى لاند : هناك بقى تقدر تقابل شخصيات ديزنى وتلعب معاهم العاب مختلفة وتعيش جو ترفيهى وتقدر تقول كدة انها بديل لديزنى اللى فى لوس انجلوس فى امريكا، فلو معرفتش تروح امريكا تقدر تزورها فى باريس وهتستمتع جدا برضه.
كاتدرائية نوتردام : من المعالم الدينية والاثرية المشهورة فى باريس حيث ان عدى عليها تاريخ كبير وعصور مختلفة وهى مازالت قائمة وتصميمها المعمارى كمان رائع.
شارع الشانزليزيه : اشهر شارع فى باريس للتسوق هتلاقى فيه شجر ومحلات كتير وتقدر تتفرج على اكبر ماركات الموضة والازياء وتاكل حاجة ومشروب رايق من اى مطعم هناك.
ميدان كونكورد : وده هتلاقيه فى نهاية شارع الشانزليزيه وانت جاى من عند تريومف كدة واللى اتعدم فيه اخر ملوك فرنسا قبل الثورة وفى قلب الميدان ده فى مسلة مصرية معروفة اتاخدت من معبد الاقصر.
قصر فرساى : من القصور المعروفة فى باريس وتقدر تزور فيه الاجنحة الملكية والاوبرا الملكية والحدائق وليه تاريخ برضه شهد فيها حكم فرنسا فى فترة ومعاهدة فرساى بعد الحرب العالمية الاولى
متحف الشمع : وده فيه تماثيل مصنوعة من الشمع لشخصيات مشهورة ومؤثرة فى فرنسا والعالم وهتحس ان الشخصيات دى زى ما تكون حقيقية بالظبط بسبب دقة تصميمها.
متحف اورسيه : المتحف ده معروف بالفنون التشكيلية لان فيه رسومات ومنحوتات لفنانين عالميين وبيستضيف عروض ازياء عالمية من وقت للتانى.
مركز جورج بومبيدو : اكبر مركز ثقافى للفن التشكيلى بسبب الاعمال الفنية الكتير الموجودة فيه، غير التصميم المعمارى المميّز للمركز ده، وتقدر تستمتع بالمعارض والسينمات والمكتبات اللى هناك.
قصر جارنييه : من القصور التاريخية فى باريس وتصميمه المعمارى جميل جدا كالعادة، غير كمان اوبرا جارنييه واللى بيتعمل فيها عروض موسيقية عالمية هتستمع جدا بيها لو بتحب المزيكا.
جسر الفنون والحب : وده معروف انه جسر الحبيبة علشان هتلاقى عليه اقفال كتير جدا متعلقة فيه وكل قفل بيعبر عن قصة حب مكتوب عليها اسماء ابطال القصة ديه.
حديقة شون دو مارس : اشهر حدائق الاستجمام والاستمتاع وتقدر منها تشوف البرج وانت قاعد كدة فى الروقان، ده غير ان بيتعمل فيها مهرجانات ترفيهية واستعراضات ممتعة جدًا.
عرفنا اشهر الاماكن؟
شوية تحابيش بقى هيظبطوا سفريتك ويخلّوها عال العال..
1- فرنسا بتتعامل باليورو وده بيخليك تصرف كتير من غير ما تحس بسبب الفرق الكبير فى العملة ف انت وشطارتك فى انك توفر فى مصاريفك بذكاء خصوصا ان الطيران مش غالى والاقامة تقدر توصل لحاجة تكون منطقية بحيث تظبط البادجت بتاعتك، ف توفيرك فى اقامتك واكلك ومواصلاتك هيفرق معاك كتير فى كل تفاصيل السفرية لان كل يورو ليه قيمة مش قليلة بتأثر فى مصاريف السفرية
2- وانت فى فرنسا خلى بالك جدا من السرقة والنشل لانه منتشر بشكل كبير وابعد عن التعامل مع الافارقة اللى بتنده عليك فى الشارع او بتحاول تبيعلك حاجة او تقولك كلام لطيف لان فى الغالب بتكون كلها عمليات نصب ف كأنك مش سامع حاجة وفى المترو بالذات خلى بالك على حاجتك وعينك فى وسط راسك.
3- الشعب الفرنساوى عادة مش بيحب يتكلم غير فرنساوى ممكن دة يتعبك شوية فى التواصل مع الناس لو مش بتتكلم فرنساوى بس هتلاقى اللى يكلمك انجليزى برضه عادى بس مش كتير لانهم بيعتزوا جدا بلغتهم.
كدة انت عرفت كل حاجة عن التأشيرة، الطيران، الاقامة، اماكن الزيارة، وكل التفاصيل التانية..
كل اللى ناقصك انك تجهّز شنطتك، وتنطلق وتسافر..
