ماهو لما تبقى لبنان ليها تاشيرة عند الوصول للمصريين، وسعر طيران القاهرة بيروت فالحنيّن، والاهم من كل ده هو عظمة جمال المناظر الطبيعية فى لبنان، طبيعى بعد كل ده ان “السفر الى لبنان” يبقى من ضمن قائمة اولوياتك.
فى المقالة ديه هنتكلم عن كل حاجة بالتفصيل، ازاى تستخرج تاشيرة لبنان للمصريين، افضل وقت فى السنة لزيارة لبنان، ازاى تحجز طيران وفنادق بأرخص سعر ممكن، ايه اشهر واهم المدن السياحية – واللى مش سياحية – فى لبنان وازاى تزورهم كلّهم، وكمان اشهر المعالم السياحية فى بيروت وفى باقى مدن لبنان كُلها، غير بقى شوية نصايح كدة هتساعدك انك توفّر فى تكاليف السفرية كلّها، تعالوا نمسك حاجة حاجة ونبدأ بتاشيرة لبنان للمصريين :
التأشيرة
هنبدأ معاكم بتأشيرة لبنان واللى تعتبر من اسهل التأشيرات للمصريين، ممكن تقدّم عليها من سفارة لبنان فى القاهرة او ممكن تسافر على طول وتاخدها من مطار بيروت.
التأشيرة من المطار سهلة بس المشكلة ان حواليها شوية جدل وفيه بعض حالات بعد مابيوصلوا مطار بيروت بيرجّعوهم القاهرة تانى، عشان كدة عملنالكم مقالة مستقلة هتلاقوا فيها كل التفاصيل اللى ممكن تخطر ببالكم، اعرف الورق المطلوب، اسباب رفض التأشيرة، الناس اللى رجعت من بيروت ياترى رجعوا ليه، كل ده فى المقالة الخاصة بتاشيرة لبنان للمصريين تقدروا تلاقوها فى قسم التأشيرات والاوراق على موقعنا..
الطيران والاقامة :
سعر الطيران للبنان فى حدود 250 دولار للفرد تقريبا..
هتلاقى مصر للطيران واللبنانية بيعملوا اكتر من رحلة يوميًا، ف دايمًا هتلاقى معاد يناسبك.
اطلع من مطار القاهرة وروح ع مطار بيروت ومتحاولش تغيّر اى مطار مالاتنين، الا لو انت مش من سُكّان القاهرة، كدة كدة هُم المطارين دول همّ اللى سعرهم رخيص وطيارانهم مباشر وكلّها ساعة وتبقى هناك، يعنى اسرع من الحتة اللى بين رابعة واول مكرم.
طبعًا كلّنا عارفين skyscanner اللى ممكن من خلاله تحجز التذكرة اللى تناسبك فخمس دقايق.
احسن وقت لزيارة لبنان بيبقى شهرين ابريل ومايو، وكمان ممكن اكتوبر ونوڤمبر، ديه الشهور اللى بين الصيف والشتا فبيكون الجو وسط، هتلحق تشوف التلج وفى نفس الوقت الجو معتدل مش سقعة، وهيكون الصيف لسه مدخلش ف مفيش فرهضة.
لكن فعليا لبنان بتتراح طول السنة عادى، حسب انتى من مُحبى الصيف ولا الشتا اختار الوقت المناسب ليك..
لبنان بلد صغيرة، موجودة عالبحر المتوسط، الساحل بتاعها تقدر تاخده من اوّله لآخره كلّه بالعربية فى 4 ساعات.
بيروت بقى موجود عالساحل، وفالنص بالظبط، ف انت من بيروت تقدر تروح لأى مدينة تانية فى خلال ساعة ونص او ساعتين بكتير، عشان كدة بنقول ان بيروت هى السنتر، فيها انشطة كتيييير تتعمل، فيها المطار الرئيسى، وكمان فيها مواقف اتوبيسات كبيرة تقدر تروح منها لأى مدينة تانية فى لبنان وترجع فى نفس اليوم.
عشان كدة اغلب الناس بتفضّل تخلّى اقامتها الاساسية طول مُدّة الزيارة فى بيروت، وخصوصًا ان باقى المُدن صغيرة نسبيًا، ف بيبقى مناسب انك تروح من بيروت لأى مدينة فى اول اليوم وترجع اخر اليوم وتقضى السهرة فى اى كافيه رايق فى بيروت.
لو حابب تتفرج على كل الاماكن اللى ممكن تقعد فيها فى بيروت، من بنسيون الحاج ابو نسمة لحد الهيلتون، تقدر تدخل على booking ، اللى هيعرضلك كل الاماكن بأسعارها ومواقعها ورأى الناس فيها كمان..
الاسعار ممكن تبدأ من 30 دولار فالليلة للفرد تقريبًا، وآه ده فعلا سعر غالى شوية.
نيجى لأحلى المُدن بقى، ونبدأ بالغالية بيروت😍
بيروت❤️
زى ماقولنا بيروت الاصل والباقى تلاميذ فالفصل، بيسمّوها باريس البحر الابيض المتوسط والروقان هو الصفة السايدة هناك..
الناس بشوشة ومبتسمة وبيحبّوا الحياه، وممكن يصرفوا اخر فلوس فى جيبهم مقابل ان مزاجهم يبقى عالى، “اللبنانى يتديّن ليتزيّن” زى مابيقولوا.. لما تروح لبنان فيه شوية اماكن اساسية كدة لازم تعدّى عليها :
عندك صخرة الروشة، اللى بيعتبروها اهم معلم فى لبنان، وعندك منطقة الحمرا، منطقة سياحية شوارعها جميلة ورايقة وكلّها مطاعم وكافيهات باستيلات جميلة ومختلفة..
كمان عندك ساحة النجمة، برضه التمشية هناك جميلة بس لو قررت تعمل شوبينج هيتخرب بيتك.
كمان ممكن تروح زيتونة باى، خليج كدة عبارة عن مرسى مراكب ويخوت رايق والغروب هناك بيبقى قمر.
من اشهر المساجد فى بيروت همّ مسجد العُمرى، ومسجد محمد الامين، شكلهم حلو جدًا ومبنيين بطراز جميل حقيقى❤️
عدّى فى طريقك على الجامعة الامريكية حلوة مش وحشة، وعدّى برضه على بيت فيروز المهجور فى حى زقاق البلاط، وممكن كمان تتصور عند سلالم القديس نيكولاس.
الاماكن ديه كلّها قريبة من بعض مش بعيد، بيروت عمومًا صغيرة، تقدر تقسّم كل الاماكن ديه وتزورها كُلّها فى خلال يومين او تلاتة بالكتير، ولو واخد اوتيل مكانه فى قلب البلد ف ممكن تروحهم كلّهم مشى، وده هيوفّر عليك فلوس مواصلات كتير غير الوقت والمجهود، اما لو حبيت تاخد مواصلة ف بيروت مافيهاش ميكروباصات داخلية، هتاخد تاكسى..
والتاكسى تسعيرته فى حدود دولارين وبتزيد بزيادة المسافة طبعًا، وخد بالك انه ممكن سواق التاكسى يركّب معاك ناس عادى.
اما بالنسبة للمواصلات بين بيروت وباقى المُدن ف فيه موقفين ميكروباصات مشهورين فى بيروت هتلاقى فيهم باصات لأى حتة فى لبنان، واحد منهم اسمه موقف الكولا، والتانى اسمه موقف الدورة.
كمان لازم اقول ان تأجير العربية اوبشن كويس جدًا فى لبنان، سعرها بيبدأ من 15 او 20 دولار فاليوم والبنزين عليك، فلو انتوا اسرة او شلّة 3 او 4 اشخاص هايبقى ده اوبشن كويس ليكم وهيوفّرلكم فلوس كتير، خطط انك تروح الحتت البعيدة كلّها فيوم واحد وأجّر فيه عربية، بس ساعتها لازم يبقى معاك رخصة قيادة دولية، اللى سهل جدًا تطلعها وهتستلمها وانت واقف، وتقدر تعرف تفاصيل اكتر عنها من مقالاتنا قسم الاوراق والتأشيرات..
وكمان لو بتعمل دايت حاول تنساه طول مانت فى بيروت، ما بين الشاورما واللبنة والشيش طاووق هاتلاقى الكالوريز بتحاصرك من كل اتجاه وبيجبروك على الاستسلام والدلدلة، ف روح مُستسلم جاهز ومتتعبش روحك.
لبنان فيها مطاعم كتير مشهورة هتلاقى اعلاناتها من وانت جوه المطار، بس انا هقولك على مطعمين مش مشهورين انما يستاهلوا يبقوا عالميين، وكل واحد فيهم مفيش منه غير فرع واحد بس..
الاول هو فلافل صهيون، هتلاقيه وانت داخل على ساحة النچمة وهتلاقيه على جوجل مابس بسهولة، محل صغير وزحمة ومش بيبيع حاجة غير ساندوتشات الطعمية، سعره غالى للاسف بس لازم عالاقل تجرّبه ولو مرّة.
اما التانى فهو محل شاورما اسمه شاورما الاستاذ، موجود فى منطقة فرن الشباك فى بيروت، اجمل شاورما لحمة كلتها فى حياتى، اجمل معاملة ستاف شوفتها فى حياتى، واسعاره مناسبة جدًا بالنسبة للكمية الكويسة اللى بيقدّمها.
كدة خلّصنا بيروت وزى ماقولنا 3 ايام هيكون كفاية جدًا على بيروت، باقى المُدن اللى جاية ديه بقى ممكن تتّاخد يوم صد رد من بيروت، تروح وترجع فى نفس اليوم، وطبعًا لو حابب تروح وتبيّت هناك تقدر تعمل ده وBooking برضه هيقولك اسعار الاقامة، واللى هتبقى ارخص شوية من بيروت بالمناسبة.
نخش بقى على باقى مُدن لبنان.. هاتوا دماغكم وتعالوا معانا نبدأ بمُدن الجنوب :
صيدا
مدينة قديمة ومش سياحية اوى، هتحس فيها بجانب مختلف من لبنان، لأنها على طبيعتها ومفيهاش سُيّاح كتير.
مشهورة اوى بشوارعها وحواريها الضيقة، والاسواق الشعبية الجميلة.
لازم تروح مدينة صيدا القديمة، وقلعة صيدا البحرية، وكمان ممكن تشترى مشغولات يدوية من هناك لأنها حلوة ورخيصة.
صيدا جنوب بيروت ساعة الا ربع سواقة تقريبًا وهتلاقى ميكروباص من موقف الكولا اللى حكينا عنّه من شوية، تروح الصبح وترجع اخر النهار.
صور :
ننزل كمان نص ساعة للجنوب بعد صيدا، هنلاقى صور، مدينة اكبر من صيدا وتعتبر اكبر مدينة فالجنوب.
فيه هناك شاطئ عام لطيف، وقلب المدينة هناك جميل، والتمشية فيه وسط المطاعم والكافيهات بتبقى لطيفة.
كمان ممكن تزور الميناء بتاعة صور بتبقى حلوة جدًا بالذات وقت الغروب.
بيت الدين :
اخر ضيعة معانا فالجنوب وتعتبر اصغرهم، وبالمناسبة هى الوحيدة اللى مش عالساحل، يعنى تعتبر جنوب شرق بيروت..
فيه حاجات كتير ممكن تتعمل هناك، اشهرهم وأهمهم هى زيارة قصر بيت الدين نفسه.
كمان روح كنيسة مار مارون، كنيسة اثرية جميلة هتلاقيها جنب القصر على طول.
كمان روح دير القمر واتمشى واتصوّر هناك، وهيبقى جنبك على طول نهر وشلالات بعقلين ف ممكن تعدّى عليه وتقضى وقت حلو هناك.
دول اشهر 3 مُدن فالجنوب، بالنسبة للشرق ف فيه مدينة واحدة تُعتبر الاكثر تميّزًا :
زحلة :
نروح شوية ناحية الشرق بقى، المدينة اللى بينها وبين حلب نص ساعة ومسقط رأس يوسف شاهين.
زحلة مدينة جميلة حقيقى، لو رُحت هناك ممكن تطلع تمثال سيدة زحلة، كمان ممكن تروح مقام نوح النبى.
التمشية فى شوارع زحلة جميلة، وأول ماتوصل هناك هتلاقى ميكروباصات بتقول شام شام، ديه رايحة سوريا يامعلم، شوف لو دماغك هبّت منّك ابقى نط فى واحد منهم.
بالنسبة بقى لمُدن الشمال ف هعرضها بشكل مختلف شوية، فيه معالم كتير فالشمال جنب بعض موجودين فى ضيع مختلفة، ف انا هقسّمهم ل 4 مجموعات حسب قربهم من بعض عالخريطة :
المجموعة الاولى – مجموعة چونيه
اشهر مدينة فالمجموعة ديه هى چونيه، اللى مشهورة بالتيليفريك بتاعها العظيم..
كمان هتلاقى مشهور جدًا هناك تمثال سيدة لبنان اللى الڤيو منه وهمى وياخد العقل!
من المعالم المشهورة القريبة من چونيه هى مغارة چعيتا، مشهورة جدًا وتستاهل فعلًا انها تتراح لأن المشى والمناظر جوه المغارة ميتنسوش.
وهضيف للمجموعة ديه مزار كفرذبيان، الجبل التلجى اللى ممكن تأجر فيه چيت سكى وتستمتع بجبال التلج..
كمان تمثال مار شربل اللى هتكشف منه ڤيو وهمى، وهتشوف منه كمان بحيرة لون ميّتها مش هتشوف زيّه فى حياتك وهى بحيرة شبروح، واللى هتنبسط جدًا لو رُحت قعدت قدامها شوية واستمتعت بجمالها.
المجموعة التانية – مجموعة چبيل او byblos زى مابيسمّوها بالانجليزى
چبيل مدينة جميلة ورايقة وصغيرة، التمشية فيها وتحديدًا فالسوق القديم بتاعها بتبقى جميلة جدًا وفوق الوصف..
ماتنساش كمان تروح قلعة چبيل القديمة اللى عالبحر وتتفرج عالغروب من هناك، حقيقى سلام نفسى هايفضل معاك سنين قدّام..
اول معلم هضيفه لچبيل هو بالوع بالعة، شلال مشكّل 3 جسور بشكل طبيعى جميل اوى، مكان فعلًا يستحق الزيارة..
وتانى حاجة هتنضم للمجموعة ديه، وهى قريبة جدًا من بالوع بالعة بالمناسبة، هى محمية أرز تنورين..
محمية طبيعية واسعة وجميلة، بتدخلها وتاخد خريطة بالمسارات اللى ممكن تمشى فيها، وتختار المسار اللى يناسب صحّتك من كيلو لسبعة كيلو، وابدأ بقى وقت عظيم جوه الطبيعة والاشجار والغابات..
آه جنب المحمية هتلاقى مطعم بسيط ورايق وهادى اسمه صاج عم شربل، المطعم بسيط بڤيو تحفة وأسرة رايقة بشوشة همّ اللى بيديروه، هايبقى نفسك ماترجعش مصر وتقعد تشتغل عندهم للابد.
المجموعة التالتة – الباترون وسيدة النورية
الباترون واحدة من اجمل وأروق المدن اللى هتدخل قلبك فى لبنان، هتحس فيها لمسة صغيرة كدة من سانتورينى بتاعة اليونان.
هناك لازم تروح القلعة الفينيقية والحائط الفينيقى، كمان زور صخرة الامير، وكنيسة مار إسطفان.
كل الحاجات ديه بينها وبين بعض خمس دقايق مشى ف ماتقلقش.
اما بقى كنيسة سيدة النورية ف ديه قصّة تانى لوحدها، الكنيسة على جبل عاااالى وعالبحر على طول، المنظر من فوق جميل جدًا وصعب تروح ومتنبسطش..
المجموعة الرابعة – طرابلس
والحقيقة ديه مش مجموعة ولا حاجة، ديه طرابلس لوحدها كدة مستقلة.
طرابلس تعتبر عاصمة الشمال لأنها من اكبر المُدن هناك، فخلّينى اقولكم دلوقتى اشهر المعالم الموجودة فى طرابلس:
ميناء طرابلس، وديه تعتبر سنتر طرابلس، كنيسة سيدة البشارة، كاتدرائية القديس جوارجيوس، مسجد عُمر ابن الخطّاب، جزيرة البقر – ايوا هى اسمها كدة
وبكدة نبقى غطّينا كل المُدن المشهورة فى لبنان، وزى ماشوفتم لبنان محتاجة عالاقل 10 ايام عشان تعرف تشوف كل حاجة هناك.
كام ملحوظة مهمّين :
1- الملحوظة ديه مش لأصحاب السفر المُرفّه، ديه للناس اللى غاويين توفير زى حالاتى، اكيد انتوا خدتوا بالكم ان سعر طيران لبنان رخيص، والتأشيرة كمان رخيصة، فكرة ان “لبنان غالية” جاية بس من ان مستوى المعيشة هناك غالى.
سعر الاوتيل لا مفر منّه لأنك مش هينفع تبات فالشارع، انما المواصلات – الاكل – الخروجات كل ديه حاجات ممكن توفّر فيها..
-توفيرك فالمواصلات جوه بيروت هييجى من ان الاوتيل يبقى فى قلب بيروت فساعتها هتروح الاماكن كلّها مشى او حتى تاكسى بس مسافات صغيرة.
-توفيرك فالمواصلات بين المدن هييجى من معرفتك لموقف الكولا وموقف الدورة، الكولا تروح منه للجنوب والشرق، الدورة تطلع منه للشمال، وكمان لو انتوا عدد ممكن جدًا تأجروا عربية زى ماقولنا.
-توفيرك فالاكل هييجى بإنك تحجز اوتيل بالفطار يكون بسيط، واضرب غدوة حلوة فى مكان حلو بس خلّى العشا خفيف، مش مسافرين ناكُل احنا!.. كدة كدة هترجع مصر تلاقى ست الحبايب مستنياك بالمحشى والممبار.
-اما توفيرك فالفُسح هييجى من تحديد اولوياتك لزيارة الاماكن المجّانية، كمان خد معاك كارنيه الجامعة لو انت طالب، وخده برضه لو انت متخرّج، ممكن جدًا يساعدك تاخد تذاكر مُخفّضة فى اماكن سياحية كتير.
2- الشعب اللبنانى رايق ميحبّش يتضايق، بيحبوا الغُنا والضحك والانبساط، وبيحبوا المصريين وعادل امام واغانى احمد شيبة، هتلاقيهم ودودين جدًا معاك وهيحببوك فالبلد
3- رواق يعنى تمام.. ع ذوقك يعنى عاجبك كدة؟.. بعد ماتخلّص اكل فى اى مطعم هتلاقى الراجل بيقولك صحّتين.. قوله ع قلبك.. عمومًا بعد يومين فى لبنان هتلاقى نفسك بتتكلم زيّهم، لهجتهم قمر وهتلاقى لسانك خد عليها بسرعة.
وبكدة نبقى قولنالكم كل حاجة تخص لبنان، وسلّمناكم العلم اللى تنتفعوا بيه فالحياه “بصوت اللمبى”.. وتروحوا وترجعوا بالسلامة
اما لو بتحب الست فيروز وعايز تقرا عن رحلة استكشافى لبيتها المهجور فى بيروت، ف هتلاقى المقالة ديه فى قسم حكاوى السفر..
انطلق وسافر، لبنان جميلة وكفيلة انها تعدل موودك وترجّعك مبسوط..
اتواصل معانا على الموبايل او الايميل لو محتاج تسأل على اى تفصيلة تانى، دايمًا هتلاقينا بنرُد.
دُمتم مُسافرين..
