لو انت من الناس اللى بتفكر تسافر تاخد جولة فى اوروبا وتزور اشهر العواصم الاوروبية، يبقى اكيد فكّرت انك تزوّد امستردام على قائمة العواصم اللى بتفكّر تزورها، والصراحة معاك حق عشان امستردام تستاهل!
امستردام واحدة من اجمل عواصم اوروبا واشهرها على الاطلاق، سُيّاح كتير من كل بلاد العالم بيزوروا امستردام بشكل سنوى، والحقيقة امستردام تستاهل كل الضجة اللى معمولة عليها ديه وزيادة شوية كمان!
خلال المقالة ديه هنحكى عن كل حاجة تخص امستردام من الاول للاخر..
التأشيرة والطيران والاقامة والخروجات وحتى اشهر المطاعم والكافيهات، جهّز شنطتك واستعد عشان هناخدك جولة كاملة لامستردام فى العشر دقايق اللى جايين.
التأشيرة | بيقولوا صعبة وشبه مستحيلة، الكلام ده حقيقى؟
تأشيرة هولندا فعلًا تعتبر صعبة لناس كتير من المصريين وده بسبب انها بتتطلب ورق كتير شوية زى معظم دول اوروبا، ولازم الورق يكون مظبوط ومنطقى ومقنع للسفارة انهم يسمحولك انك تسافر، ممكن تقدّم عليها عن طريق مكتب VFS Global فى القاهرة واللى بدوره بيوصّل كل الورق اللى بتقدمه للسفارة الهولندية..
التأشيرة بتحتاج شوية ورق بتحتاج تطلعه من كذا مكان وبيكون هدفه انهم يقتنعوا انك مستقر فى بلدك ومفيش عندك اى محاولة انك تكون عايز تسافر وتخلع وماترجعش، عشان كدة عملنالكم مقالة مستقلة هتلاقوا فيها كل التفاصيل اللى ممكن تخطر على بالكم، اعرف الورق المطلوب، اسباب رفض التأشيرة، حتى فكرة انك ممكن يرجعوك من المطار هناك بعد ماتوصل لو شكوا فيك حتى وانت معاك الفيزا! ، كل ده تقدر تقراه بالتفصيل فى المقالة الخاصة بتأشيرة شنجن للمصريين.
طيب عرفنا كل حاجة عن التأشيرة، عايزين نحجز الطيران والفنادق بقى!
سعر الطيران الى هولندا بيتراوح بين 400 ل 600 دولار تقريبا “فى الاوقات العادية”، ساعات بتطلع رحلات لُقطة من مطار الغردقة او شرم الشيخ بتكون بـ 100 دولار بس! بس بيبقى ليها شروط معينة متعلقة بالوزن وكدة ولازم تخطفها خطف!
انما فى الطبيعى هتلاقى مصر للطيران بيعملوا رحلات كتيرة، فهتلاقى مواعيد الصبح ومواعيد بالليل وبأسعار مختلفة.
اطلع من مطار القاهرة وروح ع مطار امستردام Shiphol، فى الغالب دى بتكون ارخص رحلة الا لو لقيت رحلات ارخص من كدة من مطار الغردقة اللى بتكون بشنط اقل من مصر للطيران، وطبعا تقدر تعرف وقتها اسعار التذاكر من على SkyScanner وتجيب من عليه ارخص سعر تذكرة والمواعيد وتحجزها فى خمس دقايق من وانت فى بيتك، بس حط فى اعتبارك ان السفر من القاهرة لمطار امستردام على خطوط مصر للطيران بتكون دايركت من غير ترانزيت والمسافة تقريبا 5 ساعات.
وانت بتختار المعاد اللى هتحجز فيه طيّارتك لازم تكون عارف كويس احسن وقت لزيارة هولندا، عشان ماتروحش تتفاجئ هناك ان الجو برد بزيادة، واحسن وقت لزيارة هولندا بيبقى وقت الصيف الجو بيكون لطيف من شهر يونيو لحد شهر سبتمبر كدة، والربيع فى ابريل ومايو وممكن فترة الكريسماس فى اخر السنة “اخر ديسمبر وأول يناير” بس حط فى اعتبارك ان الجو بيكون برد جدا فى الوقت ده لكن الاجواء الاحتفالية ممتعة وجميلة بسبب فترة الكريسماس ورأس السنة وهتحب تشوف البلد هناك و تعيش الاجواء دى.
اما بالنسبة للفنادق ف انت تقدر تتفرج على كل الاماكن اللى ممكن تقعد فيها فى امستردام او اى مدينة تانى، بداية من اى هوستل بسيط لحد الفندق الخمس نجوم، عن طريق موقع booking و Hostel World، اللى هيعرضولك كل الاماكن بأسعارها ومواقعها ورأى الناس فيها كمان..
الهوستيل اللى احنا قعدنا فيه كان اسمه Loft Hostel والحقيقة انه كان هوستيل لطيف خالص وبنرشّحه لكل الناس..
ندخل بقى على امستردام ونشوف ايه اللى ممكن يتعمل هناك
امستردام اهم مدينة سياحية فى هولندا ومن اجمل المُدن اللى ممكن تزورها فى اوروبا كلّها، متميزة ان كلها انهار مياه بتعدى جوة المدينة ومبانيها كلها شكلها مميز وملونة بطريقة مبهجة، والمواصلات فيها سهلة بالمترو والترام وركوب العجل، وديه من الحاجات الممتعة والمهمة اللى لازم تجربها وهى انك تلف بالعجلة فى امستردام، كل الناس بتقضى مشاويرها بالعجل وتعالى بقى نقولك الاماكن اللى ممكن تروحها و انت فى امستردام :
دام سكوير : يعتبر الميدان الرئيسى والاشهر فى امستردام، بيتعمل فيه اكبر الفعاليات والانشطة ويعتبر روح امستردام، تقدر تتمشى هناك وتشوف النصب التذكارى اللى موجود فى قلب الميدان وطبعا بتلاقى دايما عروض واحتفالات فى المكان ده تقدر تستمتع بيها وبالمزيكا اللى موجودة. المكان مليان بالحمام والطيور ممكن تصورهم وتأكلهم وتلعب معاهم.
متحف فان جوخ : من المتاحف المشهورة فى امستردام للفنان الهولندى المعروف فان جوخ والادوات اللى كان بيستخدمها فى الرسم والجوابات اللى كان بيكتبها لاخواته واعمال فنية تانى كتير لفنانين بتجذب اى حد بيحب الفن والرسومات، تقدر تروحله بالترام بسهولة او تركب عجلة زى كل الناس هناك ولما بتروح بتلاقى حجز التذاكر من برة ودى بيكون مكتوب عليها ميعاد دخولك المتحف دة ف حاول تروح بدرى علشان ماتلاقيش زحمة وتدخل بدرى اكتر وتقدر تلاقى حجز تذكرة دخول اونلاين علشان ماتضيعش وقت.
منطقة الريد لايت : وديه منطقة فيها كافيهات ومحلات كتير لما وبتكون عادة نشيطة جدًا وفيها روح ومليانة سياح كتير من كل حتة شبه وسط البلد شوية بس فيه امستردام، بس لو رُحت هناك خد بالك لأن المنطقة ديه مشهورة بأماكن الدعارة المقننة وبيع المخدرات واوعى تفكر تقف تصور بنت من المعروضين للدعارة فى المكان ده لانك هتتقفش فى ساعتها وهتدفع غرامة كبيرة ماتقلش عن 300 يورو لان الناس دى بالنسبالهم جايين يشتغلوا مش جايين يهزروا.
حديقة فوندل بارك : حديقة مشهورة جدا فى امستردام وتعتبر معلم سياحى معروف بسبب جمال الطبيعة فيها، تقدر تلف جواها بعجلة فى الممرات وسط الزرع والورد منظر مبهج جدا وبيتعمل فيها عروض فنية تخليك مستمتع باليوم، ده غير المعالم الاثرية والمطاعم والكافيهات يعنى من الاخر مخلوش حاجة ماتعملهاش وانت هناك.
متحف مدام توسو : وده من اشهر متاحف الشمع فى العالم ومعروف جدا فى امستردام وهو عبارة عن متحف بيضم تماثيل مصنوعة من الشمع لشخصيات مشهورة وشكلهم زى الحقيقة بالظبط كأنك قابلت الشخصيات ديه، منها على سبيل المثال تمثال لمحمد صلاح العالمى فخر العرب هتلاقوا ليه تمثال موجود فى المتحف دة.
حى جوردان : وديه تعتبر زى منطقة وسط بلد كدة فيها محلات كتير تقدر تتسوق فيها وكافيهات علشان لو تحب تقعد تتغدى او تشربلك حاجة فى الرايق، المنطقة نفسها قديمة وفيها بيوت قديمة كان بيسكن فيها المهاجرين زمان، من ضمنهم بيت “ان فرانك” اللى كانت مستخبية فيه لمدة سنتين وقت الحرب العالمية التانية هروبًا من النازية وموجود فى البيت ده كل الذكريات بتاعتها متوثقة.
: داى يوز لمدينة اوتريخت
اوتريخت ديه مدينة جميلة موجودة فى قلب هولندا تقدر توصلها بقطر من امستردام فى نص ساعة بس، هى شبه امستردام شوية فى شكل البيوت والشوارع لكنها اهدى منها، فيها كافيهات ومطاعم كتير حلوة تقدر تقعد فيها ومحلات كتير لو تحب تعمل شوبينج. اثناء زيارتنا ليها اسمتعنا جدا وخصوصا كان معانا صديق هولندى ساعدنا نلف فى كل الشوارع ونشوف منظر البيوت الجميل وقنوات المياه زى امستردام كدة
الحاجات المميزة ممكن تزورها فى اوتريخت :
ساحة دوم : مكان تاريخى فى اتوريخت تقدر تتصور عنده وتشترى سوفينير وتشربلك حاجة كدة فى الروقان ، كمان تقدر تطلع برج دوم هناك تشوف منظر بانورامى للمدينة وتصميم البرج نفسه جميل ومختلف.
وسط البلد : هناك بقى قنوات المياه موجودة ومنتشرة فى قلب الشوارع وبين المبانى والبيوت والمطاعم والكافيهات، اللى هتلاقيهم موجودين فى كل حتة تقدر تقعد تاكل وتشرب فى المكان اللى يعجبك وكل مكان واخد ستايل وجو مختلف عن التانى، فيه جولات لتذوق انواع الجبن المختلفة لان هولندا طبعًا من اكبر دول انتاج الجبن فى العالم.
مركز هوج كاثارين : ده بقى مركز تجارى كبير جنب السكة الحديد ولو لفيت فيه ودوّرت كويس ممكن تلاقى حاجات لُقطة بأسعار رخيصة وممكن تلاقى نفسك على اخر اليوم ضيّعت كل فلوسك هناك من غير ماتاخد بالك.
وبكدة نبقى حكينالكم كل حاجة تخص امستردام بكُل تفاصيلها، وزى ماتفقنا ماينفعش تزور هولندا من غير ماتروح امستردام..
بس فى حالة انك معاك وقت اكتر تقضيه فى هولندا، وخلاص زرت امستردام بكل الاماكن الحلوة اللى فيها، ف انت ممكن تروح روتردام، تانى اكبر مدينة فى هولندا بعد امستردام.
روتردام.. تانى اكبر مدينة فى هولندا.
روتردام من اجمل المدن الهولندية وتعتبر زى مجمع تجارى كبير، فيها ميناء مشهورة هناك من اكبر موانى العالم، غير ان شكل المبانى فيها جميل جدا وممكن تحس انها زحمة شوية بسبب ان ناس كتير بتحب تروحها لانها تستحق الزيارة، لكن الحركة فيها سهلة زى امستردام بالظبط، وتعالوا بقى نحكيلكم عن اهم الاماكن السياحية فى روتردام.
برج يوروماست : اطول واشهر برج فى هولندا وده تقدر تطلعه عادى وتتفرج على روتردام كلها من فوق، المنظر بيكون تحفة وكمان البرج ده بيطل على الميناء بتاعة روتردام فجمال المنظر من فوق بيكون وهمى حقيقى، مش بس كدة كمان هتلاقى مطعم فوق تقدر تاكل وانت فى السما كدة، وكمان تقدر تاخدلك اوضة تنام فيها ليلة كدة زى الفندق، وخد الكبيرة بقى بيسمحوا للناس اللى بتحب المغامرة انهم يقدروا ينزلوا من البرج متسلقين على حبل، بص روح انت بس هناك وكدة كدة هتستمتع مفيش اوبشن تانى.
حديقة حيوان روتردام : ديه من اشهر واكبر الحدائق فى هولندا، طبعا فيها زرع وزهور جميلة فى كل حتة، غير الحيوانات اللى انت ماتعرفهاش واللى ماشوفتهاش قبل كدة ،حيوانات نادرة ومنها اللى مهدد بالانقراض، فيه كمان مطعم جميل فى الحديقة تقدر تاكل فيه، ده غير كمان جميل شبه القبة كدة موجودة جوة الحديقة، مليانة زهور وفراشات ملونة منظرها تحفة، وفيه احواض سمك فيها سمك قرش وتقدر تشارك فى انك تأكّل الحيوانات بنفسك وكمان فيه منطقة للعب الاطفال.
البيوت المكعبة : وديه مجموعة بيوت معمولة بتصميم شكله غريب ومختلف كمشروع لحل مشاكل الازدحام السكانى، تقدر تتجول بينها وتصورها وتلف المنطقة كلّها وتاكل اكلات مختلفة فى المطاعم اللى هناك، ده غير ان فيه اماكن هنتك تقدر تشترى منها سوفينير وهدايا.
طواحين كنديرديك : وديه منطقة فيها طواحين قديمة تاريخية مش هتشوف زيها فى اى مكان تانى فى العالم، كانوا بيستخدموها علشان التربة الزراعية ماتكونش غرقانة ف بيضخوا المياه منها، وتقدر كمان تشارك فى تشغيل الطواحين ديه عن طريق انك تدخل جوّه الطاحونة نفسها، غير انك ممكن تاخد مركب فى المياه او تركب حنطور وتتفرج على المنطقة وتصورها وتعيش اجواء هولندية ريفية ممتعة.
جسر ايراسموس : كوبرى مشهور جدا فى هولندا بيعدى على نهر الراين، شكله تحفة وبيربط بين شمال وجنوب المدينة وبيتعمل عليه ايفينتات واحتفالات كتيرة، ده غير ماراثون الجرى والعجل والاستعراضات المختلفة زى مشاهد هوليوود. هتنبسط جدًا لو خدت عجلتك وعديت بيها على الكوبرى ده هتوصل لمدينة فيها بيوت قديمة منظرها ياخد العين
وبكدة نبقى غطّينالكم امستردام وروتردام بالكامل وخلينا نقولكم شوية ملاحظات مهمة :
1- هولندا مشهورة جدا بركوب العجل زى ما قولنا قبل كدة علشان كدة العجل منتشر جدا، والعجل بيعتبر من الحاجات المهمة فى هولندا وبيتعاملوا معاه كوسيلة مواصلات اساسية كدة عندهم، ننصحك انك تخوض التجربة دى وانت هناك وتلف بالعجلة فى البلد خصوصا كمان ان ده هيوفر عليك كتير من فلوس المواصلات لان المواصلات هناك غالية وهتكلفك كتير
2- هولندا مشهورة بأنتشار بيع المخدرات وبتلاقيها داخلة كمان فى مكونات اكل زى الكوكيز والكيك وحاجات تانى كتير، بس دايمًا هتلاقى عليها علامة بتوضح ان الحاجة دى جزء من مكوناتها المخدرات او الحشيش فماتقلقش خالص، كمان فيه حاجة غريبة عند الناس دى الحقيقة وهى ان شرب الحشيش والمخدرات مسموح عادى فى اى وقت واى مكان فى هولندا لكن ممنوع تماما شرب الكحوليات فى الشارع، وغرامة شرب الكحول فى الشارع بتوصل لـ 90 يورو على العكس تقريبا فى كل البلاد اللى بتمنع المخدرات بس بتسمح بالكحول فى الشارع عادى.
3- من الحاجات كمان المشهورة فى هولندا هى صناعة انواع كتير من الجبن لدرجة انهم بيعملوا جولات سياحية لتذوق الجبنة، فلو انت من محبين الجبنة هتنبسط فى الجولة دى وانصحك كمان تجرب مركب فى قنوات المياه فى هولندا تاخد بيها جولة فى البلد بتكون ممتعة جدا.
4- لما بنقول ان المخدرات والدعارة منتشرة فى هولندا ناس كتير بتاخد انطباع ان البلد مش امان، لكن فى الحقيقة ان هولندا بلد امان جدا وكل واحد هناك بيكون فى حاله تماما محدش له دعوة بحد، لدرجة انك بتقدر تمشى فى نص الليل ووش الفجر لوحدك وبتلاقى ناس بتمشى لوحدها وبنات لوحدها فى الشارع عادى بكل امان.
خُدلك لفة فى قسم حكاوى السفر وقسم الاوراق والتأشيرات هتلاقى برضه معلومات كتير تفيدك، وماتنساش تتابعنا على السوشيال ميديا عشان توصل مل اخبار سفرياتنا الجاية اول بأول، ودمتم مسافرين..
