هتشُق الصحرا، وهتفضل ماشى طريق طويييل، يمينك وشمالك ووراك وقدامك كلّه صحرا، هتفضل كدة كتير، ييجى 9 ساعات مالقاهرة “انشف يابطل“!
بعدها هتوصل واحة سيوة!
هتلاقى نفسك وصلت مكان كله نخل وشجر، وينابيع مياه ربنا مخرّجها من قلب الارض، وبحيرات مالحة وبحيرات عذبة، ومبانى قديمة بتعكس حضارة وتاريخ مالهمش مثيل فى العالم كلّه!، والاهم من كل ده انك هتلاقى ناس طيبين وقلوبهم صافية وضحكتهم دايمًا منوّرة وشّهم..
حمدالله عالسلامة.. انت وصلت سيوه.
لو سمعت كتير قبل كدة عن واحة سيوة، ونفسك تاخد الخطوة وتسافرها، يبقى هات دماغك وتعالى عشان فى المقالة ديه هنتكلم عن كل المعلومات عن واحة الغروب الجميلة سيوة..
من اول التوقيت المناسب للزيارة، للمواصلات وأماكن الاقامة، للبرنامج والمعالم الاساسية اللى لاااازم تعدّى عليها وانت هناك، لحد حتى المطاعم ومحلّات الهدايا اللى هتختم بيها زيارتك لسيوة.
ازاى وإمتى اروح سيوة؟
بص يا اكسلانس، احسن وقت لزيارة سيوة هو من اكتوبر لحد ابريل، لأننا زى ماقولنالكم فوق ان سيوة هى واحة طبيعية فى قلب الصحرا، ف انت فعليًا حواليك الصحرا من كل الاتجاهات، ف الصيف هناك بيبقى حر جدًا، فلو عايز تستمتع بزيارتك فعلًا يبقى ابعد عن الصيف، الجو هناك بيبقى متوسط وهتقدر تستمتع بكل لحظة، غير ان شهر نوڤمبر فى سيوة بيبقى موسم الحصاد، وده بيُعتبر التوقيت المثالى لزيارة سيوة.
اما بالنسبة لعدد الايام فسيوة عدد الايام المناسب لزيارتها هو من 3 ل 5 ايام، لو 3 ايام هايبقى برنامجك مضغوط شوية بس هتلحق تغطّى كل المعالم المشهورة، اما لو قضيت هناك 4 ل 5 ايام كاملين ف ده هايكون مثالى جدًا.
اما بالنسبة للمواصلات فعندك اكتر من اختيار، اولًا لو معاك عربيتك الخاصة ده ممكن يكون اوبشن كويس جدًا، وساعتها هتقدر تشد عالطريق وممكن توصل سيوة فى فترة من 7 لـ 8 ساعات.
بس خد بالك ان اخر 300 كم قبل سيوة هُم طريق مافيهوش خدمات ولا شبكة موبايل – وصلة مطروح سيوة – خلّيك مفوّل عربيتك وشاحن موبايلك ومفوّق، واعمل حسابك ان الوصلة الاخيرة ديه فيها شوية تكسيرات فلاااازم تاخُدها فى النور.
الاوبشن التانى اللى بعد كدة هو اتوبيس غرب الدلتا، وبرضه لو انت اسكندرانى فهتلاقى اتوبيس غرب الدلتا بيتحرك من منطقة محرم بك بس مواعيده بتتغيّر من وقت للتانى فلازم تروح وتسأل بنفسك.
اتوبيس غرب الدلتا عادًة بيوصل من القاهرة لسيوة فى 10 ساعات تقريبًا.
فيه اوبشن تالت هى الشركات الخاصة للعربيات الهايس ال12 راكب وده برضه اوبشن كويس..
طيب ياسيدى وصلت سيوة بالسلامة.. هبات فين؟
طبعًا سيوة – زيّها زى غيرها من المناطق السياحية – فيها مستويات مختلفة من الفنادق، المستوى القليل والمتوسط والعالى، وكل واحد وميزانيته..
اهم حاجة لو معكش عربية حاول تختار فندق قريب من قلب سيوة “وسط البلد“
لو حابب تعرف اماكن اكتر للاقامة فى سيوة تقدر تستخدم موقع Booking اللى بيعرض كل اماكن الاقامة بمُختلف مستوياتها، ولو عايز تعرف ازاى تستخدم Booking وازاى تحجز من عليه، تقدر تقرا كل المعلومات ديه فى مقالتنا لشرح استخدام موقع Booking
وصلنا، وخدنا الاوتيل، هنروح فين بقى؟!
سيوة فيها اماكن كتيييير حلوة، زى ماكتبنا فوق ان 3 ايام فى سيوة ممكن يادوبك يكفّوا انك تتفرج على معظم معالمها، وهتبقى ضاغط نفسك جدًا كمان، انما 4 ايام هيكفّوا مرتاح.
طيب ياترى ايه اشهر المعالم ديه؟
اروح فين فى سيوة؟
البحيرات المالحة
درجة ملوحة البحيرات ديه اعلى من اى بحر نزلته قبل كدة فى حياتك، لدرجة انك لو حاولت تُقف فالمياه هايبقى صعب، غصب عنك هتلاقى المياه بترفع رجلك وبتجبرك انك تبقى نايم ومستلقى تمامًا عالبحيرة.
البحيرات المالحة من اجمل معالم سيوة ولازم لو رُحت سيوة تعدّى عليها، واوعى المياه هناك تيجى على وشّك عشان هتفضل لمدة ساعتين تلاتة عالاقل عينك بتحرقك جامد بسبب ملوحة المياه.
وطبعًا البحيرات ديه مجّانية ملهاش تذاكر دخول.
حصن شالى القديم
وده حصن القلعة القديمة اللى كانت فى سيوة، ليها بواقى لسه موجودة وطلوع القلعة بيبقى ممتع، من فوق هتكشف الواحة كلّها وتاخد كذا صورة حلوين، لما تطلع حاول تنسق مع مُرشد سيوى يطلع معاك عشان يشرحلك تاريخ الحصن اللى بيكون مثير للاهتمام جدًا، كمان اتمشى حوالين القلعة لأن ده يعتبر قلب البلد، اشترى هدايا زى التمر والمشغولات اليدوية، واقعد على قهاوى واشرب الشاى السيوى الجميل اللى بحشيشة الليمون، اتغدى فى اى مطعم محلّى يقابلك، عيش حياة الناس هناك شوية عشان تطبّع بطباعهم وتخوض التجربة كاملة.
اتفرج عالغروب فى جزيرة فطناس
ماهى واحة سيوة متسمّتش واحة الغروب من فراغ، روح جزيرة فطناس فى وقت الغروب، هتلاقى هناك الكراسى مرصوصة كأنها سينما بالظبط، الناس بتروح تتفرّج على الغروب هناك كأنه فيلم!
غير طبعًا الصور الحلوة اللى تقدر تتصورها هناك فى وقت الغروب، حقيقى مشهد الغروب من جزيرة فطناس بيبقى جميل اوى واللى بيفوّته بيخسر كتير.
السافارى – شوية اكشن بقى!
لا حقيقى شوية اكشن جامدين!
السافارى فى سيوة مش بيبقى بالبيتش باجى زى دهب، لا خااالص.. السافارى هنا بتبقى بالعربيات التويوتا ال4*4 واللى بتاخدك وتدخل بيك بحر الرمال الاعظم، وخد تنطيط واكشن بالعربية كتير بقى يامعلّم!
السافارى فى سيوة مغامرة تخطف قلبك بكل معنى من معانى الكلمة، اكشن حقيقى ولازم يبقى قلبك ميّت وجامد عشان تخوض التجربة ديه!
غير ان اثناء رحلة السافارى العربيات هتوقّفك فى كذا حتة مختلفة، زى مثلًا نبع مياه سخنة، منطقة الحفريات، قمة الجبل “عشان تتفرج عالغروب وتشرب شاى سيوى، وتعمل ساند بوردينج كمان.”
جبل الموتى
هو اسمه يخُض اه، بس هو جبل عادى وصغير كمان “طلوع عشر دقايق مثلًا”، هو بس اتسمى كدة عشان فيه مقابر فرعونية، واللى بالمناسبة هتقدر تدخل مقبرة منهم لسه محتفظة بألوانها وتتعرف على جانب جديد من حضارتنا الفرعونية الجميلة.
جبل الدكرور
وده الجبل الوحيد فى سيوة اللى بيتطلع بالليل مش الصبح، وده لأن منظر النجوم من فوق بيبقى وهمى، الجبل مكانه فى وش كامب الشيخ على خالد على طول، وديه واحدة تانية من مميزات الكامب وهو قربه من جبل الدكرور.
عين كيلوباترا
وديه واحدة من اجمل واشهر عيون المياه الطبيعية فى سيوة، هناك هتقدر تروح وتنزل العين وتعوم فيها شوية، غير ان فيه محلّات مشغولات يدوية كتير حوالين العين، بيبعوا حاجات حلوة جدًا ومش هتلاقى زيّها فى حتة تانى فى العالم.
ديه كانت كل معالم سيوة، زى ماقولنالكم عشان تغطّى كل المعالم ديه هتحتاج فى حدود 4 ايام.
سيوة جميلة، احنا كـ 4 Travellers لازم نروحها عالاقل مرّتين او تلاتة فى السنة، انت كمان لازم تجرّب تروح سيوة عشان صعب اوى تسافر سيوة ومتنبسطش.
