دليلك الكامل فى السفر الى دهب

ممكن تروح دهب فى 7 ساعات او فى 12 ساعة، ممكن تقعد فى فندق فى دهب بـ1000 جنيه فى كامب بـ200 – دهب فيها اختيارات كتيرة هنحكيلكم عنها كلّها، غير طبعًا ترشيحات لأجمل الفنادق والشواطئ والمطاعم والكافيهات

دليلك الكامل فى دهب – المواصلات والاوتيلات والخروجات – كل حاجة محتاج تعرفها قبل ماتسافر دهب

دهب هى المكان الوحيد فى مصر اللى يستاهل يتقال عليه ببساطة انه مش فى مصر
كل حاجة فى دهب مختلفة، الناس رايقة وبتضحك ومبسوطة، روح البساطة والبهجة مسيطرة على كل حاجة، صعب تعرف حد راح دهب ومرجعش مبسوط

تعالوا نحكيلكم عن كل حاجة فى دهب، من اول المواصلات اللى هتنجزك فى الطريق من القاهرة لدهب، وكمان اجمل الاوتيلات فى دهب سواء الكامبات الرخيصة او الاوتيلات الغالية، وكمان هنحكى هنا عن اجمل مطاعم وكافيهات وشواطئ فى دهب، وكل حاجة هنقول متوسط سعرها وهنوصفها وصف سريع بحيث تختار اللى يناسبك

1–  المواصلات من القاهرة  7 ساعات او 12 ساعة براحتك

طبعًا عندك حلول كتيرة، اول حل بييجى فى دماغ كل الناس هو شركات النقل الخاص زى جو باص وبلو باص وخلافه، وده حل كويس وموفّر بس مشكلته انه بياخد وقت طويل اوى فى الطريق وفى الكماين، يعنى ممكن توصل دهب فى 12 ساعة مثلًا
لأن الاتوبيسات ديه بتاخد وقت طويل جدًا على ماتتفتّش، وعلى ما يتم الكشف على بطايق كل الركّاب، فبتلاقى الموضوع طوّل جدًا وأخد اكتر من الطبيعى

الحل التانى بقى هو الميكروباصات التويوتا الهايس السقف العالى زى مابيسموها، وديه بتبقى اسرع جدًا وبتنجزك وبتوصّلك دهب فى 7 ساعات بالكتير، عدد ركاب اقل يعنى تفتيش اسرع وإنجاز فى الوقت اكتر
يمكن هاتبقى اغلى شوية آه، بس صدقنى الفرق يستاهل

وطبعًا الاوبشن التالت انك تنطلق بعربيتك، والحقيقة ده هايبقى فى الكماين اسرع واسرع، غير ان السواقة على طريق كاترين ممتعة فعلا، وده رأى كل اللى جرّبوا يروحوا سايقين

2–  الاقامة فى دهب / خلّيك فى الممشى او قريب منه

متسحلش نفسك بعيد عن الممشى إلا لو معاك عربية، خد اوتيل يكون فى الممشى او عالاقل يكون قريب منه
ممشى دهب هو المكان السياحى الاشهر واللى يعتبر قلب البلد، المطاعم والكافيهات والاوتيلات ومكاتب الرحلات، كل حاجة هتحتاجها موجودة هناك، ف متبعدش عن الممشى

اما بالنسبة لسعر الاقامة فعندك كامبات ممكن تبدأ ب200 جنيه فى الليلة، لحد الاوتيلات اللى توصل ل 1000 جنيه فى الليلة
انت وميزانيتك بقى يامعلم، كُنا كتبنا مقالة قبل كدة عن اهم النصايح اللى تاخد بالك منها وانت بتختار اى اوتيل فى اى مكان فى العالم، تقدروا تلاقوا المقالة ديه من قسم حكاوى السفر

3–  اشهر الشواطئ والمحميات الدهباوية

لو انت ماروحتش دهب قبل كدة ف انت اكيد سمعت كتير قبل كدة عن ال 3Pools  او الBlue Hole  او اللاجونا.. وحاجات تانية كتيرة

تعالوا نقولكم باختصار كل حاجة من دول عبارة عن ايه وبيتعمل فيها ايه، وسعرها كمان فى حدود كام عشان محدّش يشتغلك

3Pools الثرى بوول –

ده شاطئ على بُعد ربع ساعة تقريبًا بالعربية من الممشى، عبارة عن 3 فتحات من الشُعب المرجانية متّصلين ببعض تحت المياه، كل pool من التلاتة ليه درجة حرارة مختلفة ودرجة زرقان مياه مختلفة، وشُعب مرجانية وأسماك ألوانها جميلة ومش موجودة فى حتة تانية، هناك هتقضى اليوم فى اى كافيتيريا من اللى عالبحر وهتستمتع بمنظر الجبل على البحر، غير وقت السنوركلينج طبعًا اللى بيبقى ممتع جدًا
ومن هناك ممكن جدًا تعمل رحلة السافارى اللى بيروح بيك مكان مميّز جدًا اسمه وادى جنى، وديه برضه بتبقى من الحاجات المميّزة فى دهب
سعر الفرد لرحلة ال 3Pools هتلاقيه فى حدود من 100 ل 150 جنيه، وده شامل المواصلات لهناك وتأجير ماسك السنوركلينج والقعدة فى كافيتيريا والغدا كمان، وممكن من الكافيتيريا تأجر لايف چاكت لو مش بتعرف تعوم بيبقى بـ30 جنيه
اما سعر رحلة السافارى ف بتبقى فى حدود 350 جنيه للبيتش باجى “بيشيل فردين“

–  رحلة اليخت من جبر البنت
جبر البنت هى منطقة برضه على بُعد ربع ساعة بالعربية تقريبا من الممشى، بتوصل مرسى اليخوت هناك وتبقى متّفق وحاجز يخت هياخدك ويرسى بيك فى قلب البحر، اما الرحلة الصباحية اللى بتبقى من 9 الصبح ل3 الضهر تقريبًا، او رحلة الغروب اللى بتبقى من 4 الضهر ل9 بالليل، اختار المعاد اللى يناسبك بس احنا بنرشّح رحلة الغروب
بتقضى بقى طول الوقت هناك بين انك بتعمل سنوركلينج حوالين اليخت، بتشغل مزيكا وتستمتع بوقتك، بترقص، بتشوى، عيش حياتك زى ماتحب
احنا بنرشّح مركب جميل هناك اسمه  Interprize boat، معاملة جميلة ومركب نضيف وسعر كويس، وابقى اسأل على “مالك” مدير المركب وابعتله سلامنا

سعر الفرد فى رحلة المركب بيبقى فى حدود 500 جنيه حسب السيزون وعدد الضيوف، السعر ده بيبقى شامل الغدا وكل التصاريح وعدة السنوركلينج، ومش بيبقى شامل المواصلات

– البلو هول و محمية ابو جالوم والبلو لاجوون

ده بقى هيكون واحد من اجمل الايام اللى هتقضيها فى دهب
وده مقسوم 3 اماكن زى مانتوا شايفين، اول مكان اسمه البلو هول وده يعتبر اشهر مكان فى دهب، السنوركلينج هناك وهمى وملوش زى!، الشعب المرجانية شكلها مختلف وناس كتير بييجوا مصر مخصوص عشان يتفرجوا عالشُعب اللى هناك
اما تانى مكان هو محمية ابو جالوم، وديه بتروحها بلانش بحرى من البلو هول، وهناك برضه هتلاقى شُعب مُرجانية جميلة جدًا، غير انها مش عميقة اوى ف مفيدة للناس اللى بتخاف من المياه
اما تالت مكان فى الرحلة العظيمة ديه ف هو شاطئ البلو لاجوون، اجمل درجة نقاء مياه ممكن تشوفها فى حياتك
لون المياه هناك مختلف ونقى عن اى مكان تانى فى مصر!، تقدر تروح البلو لاجوون بعربيات بتبقى موجودة فى ابو جالوم

لو هتروح ال3 اماكن فى يوم واحد يبقى خد بالك لاااازم تتحرك من بدرى جدًا عشان تلحق تستمتع بال3 اماكن، اما لو قررت تفصلهم – واحنا بننصح بده لو انت معاك وقت – يبقى روح البلو هول فى يوم لوحدها، وابو جالوم وبلو لاجون فى يوم تانى

كمان فيه ناس بتعمل حركة حلوة وبتروح تبيّت ليلة فى ابو جالوم او بلو لاجون، فيه هناك كامبات بتبقى على البحر على طول، بتبقى بسيطة مش مُرفهة، يادوب خوشة فيها مرتبة فى الارض وحمّام مُشترك للكامب كُله
فلو انت حد بيحب الcamping  و التخييم يبقى هتستمتع جدًا لو قضيت ليلة هناك

سعر الفرد فى الرحلة كاملة بيبقى فى حدود 400 جنيه تقريبًا، وده شامل كل الانتقالات رايح راجع، والغدا، والقعدة فى كافيتيريا فى ال3 اماكن بدون مشاريب، وتأجير عدة السنوركلينج كمان

– رحلة جبل الطويلات / ليك فى الدوشة ولا فى الهدوء؟

ديه الحاجة الوحيدة بين كل الرحلات اللى فوق اللى بتتعمل بالليل، باقى الايام بقى عندك الممشى بكل الكافيهات والمطاعم اللى فيه، واللى هنتكلم عنها بالتفصيل كمان شوية
اما سهرة جبل الطويلات بيبقى ليها ستايل من اتنين – حسب موودك ومزاجك -، لو طالبة معاك دوشة ورقص ومزيكا عالية، فعندك فيه اماكن بتبقى مُجهزة فى الجبل وفيها DJ وبيشغلوا مزيكا بدوى او شعبى بصوت عالى والناس بترقص معاهم، وكمان بيعملوا عروض زى التنورة والfire show
اما لو طالبة معاك هدوء وروقان ف برضه فيه اماكن معينة بيبقوا فارشين ومجهزين اماكن زى كافيتيريات فى قلب الجبل، بس المرادى بيبقى ستايل المكان هادى ومولّعين نار وبييجى راجل بدوى يغنى اغانى هادية حوالين النار
الستايل التانى ده ممكن ناس تشوفه ممل شوية، بس لو انت صاحب مزاج وغاوى روقان هيعجبك اوىالنوع ده من السهرات

سعر الفرد فى حدود 150 جنيه، شامل المواصلات للجبل والقعدة فى الكافيتيريا والشاى والعشاء

طيب ياترى ايه اشهر المطاعم والكافيهات الموجودة فى الممشى؟

الممشى السياحى يعتبر هو قلب دهب ومركزها، هو عبارة عن شارع كبير على البحر تقدر تمشيه من اوله لآخره فى ربع ساعة تقريبًا، فيه فى نصّه تقريبًا كوبرى خشب معروف جدًا
الممشى مليان مطاعم وكافيهات على البحر، ومحلات هدايا ومحلات هدوم، غير الاوتيلات طبعًا ومكاتب السياحة، التمشية فعلا حلوة وممتعة جدًا ومهما تعملها كل يوم عُمرك ماهتزهق منها

بالنسبة للكافيهات ف فيه كافيهات جميلة كتير فى دهب، كلها عالبحر وكتير منهم بيقدموا فعلا خدمة جميلة
من اشهرهم طبعًا هُم Everyday Cafe و Everyday Old Cafe و Yalla Bar و WhyNot Cafe وغيرهم اماكن كتيرة
كتير اوى الاماكن اللى فاتت ديه بتكون جايبة باند يعزف مزيكا وده بيبقى وقت فعلًا ممتع ومُسلّى
غير طبعًا الصور اللى لازم تتصورها فى الاماكن ديه اما عند الديكور بتاعها او على المرجيحة اللى بيكونوا عاملينها عالبحر على طول، وطبعًا كتير شوفنا اصحابنا متصوّرين هناك

تعالوا بقى ناخدكم فى جولة سريعة لأجمل المطاعم اللى ممكن تاكلوا منها هناك

هنبدأ بالسى فوود وأكيلة السى فوود فيه 3 اماكن فالممشى بيقدموا سى فوود جودته حلوة جدًا، التلاتة جنب بعض وهتلاقيهم فى الممشى بسهولة
الاول اسمه Shark والتانى اسمه Friends والتالت اسمه Yalla Bar اللى لسه جايبين سيرته من شوية
ال3 اماكن بيقدموا سى فوود مستوى جودته حلو جدًا فعلا، بس ابقى تقّل جيبك شوية وانت رايح لأن الدنيا مش رخيصة

عشان تختار بينهم روح لكل واحد فيهم وهاتلاقى دايمًا فيه حد واقف عالباب وفيه جنبه زى تلاجة مفتوحة كدة فيها السمك، ابدأ دردش معاه واسأله عالاصناف اللى انت بتحبها وطريقة عملها وسعرها
هاتلاقى الناس لطيفة جدًا وبيتجاوبوا معاك، وممكن يسعّرولك الطلب بتاعك وانت واقف
والمكان اللى يعجبك فيهم ادخله

بالنسبة للمشاوى بقى ف لازم تجرّب King Chicken ، كميات مهولة وطعم جميل واسعار مش غالية، كمان فى وشه مباشرة هاتلاقى ساندوتشات البورسعيدى، يعنى اطعم ساندوتشات بانيه بلدى وكبدة بالردة وسجق ممكن تاكلها فى دهب والسعر فى الحنيّن

كمان فى المشويات ممكن تجرّب كاركور، وده تقدر تعتبره مستوى شعبى شوية فالمشويات، كبدة بالردة بقى وكفتة وطرب ودلّع كرشك يامعلّم!
القعده عادية مش مميّزة بس مستوى الاكل كويس بالنسبة للسعر

اما بالنسبة للبيتزا ف عندنا اخيارين حلوين جدًا ومن احلى الاماكن فى دهب، الاول مطعم Athanor وده صاحبه ايطالى وكواليتى البيتزا هناك حلوة جدًا بس الحجم مش هيسند معاك اوى، كمان الباستا هناك اختيار ممتاز، وكيّفية القهوة ممكن يجربوا القهوة هناك هيلاقوها مختلفة ومميّزة
اما الاختيار التانى ف هتلاقيه فى وشّه على طول واسمه Red Cat وده برضه طعم البيتزا فيه جميل وكمان الحجم حلو جدًا

كمان من ضمن اختيارات الغدا والعشا هو مطعم علاء الدين، وده بيعمل كل الحاجات اللى فوق ديه زائد انه كمان اسعاره حلوة وكميّات الاكل بتاعه حلوة جدًا والكوالتى لطيفة
الستاف والقعدة حلوين ومكانه فى قلب الممشى بالظبط، بعد الكوبرى الخشب على طول

اما بالنسبة لاختيارات الفطار ف عندك يم يم العلامة المسجلة للفول والطعمية فى دهب، وفيه كمان ابو احمد برضه مطعم فول وطعمية بس شعبى اكتر من يم يم لأن يم يم هتحسه سياحى شوية كدة، لكن ابو احمد هتاكل عنده بعشرين جنيه ومش هتجوع تانى لمدة 3 سنين تقريبًا

وبكدة يبقى انت معاك الدليل الكامل لدهب، لو انت غاوى سفر جوا مصر يبقى لازم تدخل تقرا باقى مقالتنا عن الدليل الكامل لمُدن مصر 

لو ماروحتش دهب قبل كدة احنا بننصحك جدًا تروح، المدينة ديه مختلفة عن كل مُدن مصر وليها شخصية مختلفة هتخبطك من اول مارجلك تدخلها، واللى بيروحها مرة لازم يروحها من تانى