لو انت عمرك ماسافرت برا مصر قبل كدة يبقى انت اكيد حاسس انك لو دخلت المطار هتتوه😂😂
غلط، ببساطة احب اقولك انك لو حاولت تتوه جوه المطار مش هتعرف، وده لأن الطريق جوا شبه اجبارى ومستحيل تعدى من موظف مش مسموحلك ان تعدى من او تاخد طريق غير طريقك، ف مبدأيًا اتطمن.
اومال ايه اللى بيحصل جوا المطار؟
شايف المبنى الكبير اللى انت مخضوض منه ده؟
مجرد ماتدخله ولحد ماتوصل طيارتك مفيش غير اجرائين اتنين بس هم اللى انت هتعملهم، والباقى كله تفتيشات وبس كدة..
اهم ملحوظة: اوصل بدرى 3 ل 4 ساعات عن معاد السفر، عشان تكون براحتك جوا وتستمتع بكل الخطوات وبالتجربة كاملة.
هتوصل على الصالة بتاعتك واوعى تغلط فى رقم الصالة لأن فى مطارات كتيرة بتكون مبانى المطار بعيد عن بعض شوية، رقم الصالة بتاعتك هتلاقيه مكتوب بوضوح فى تذكرة الطيران..
الاجراء الاول : كاونتر شركة الطيران وعمل التشيك ان.
مجرد ماتدخل المبنى الكبير ده هتلاقى شاشات فى كل حتة، مكتوب عليها رقم رحلتك “هتلاقيه على التذكرة – غالبا بيكون حرفين + 3 ارقام” والمدينة اللى طيارتك رايحاها ومعاد الطيارة وجنبهم ارقام الكاونترز الخاصة برحلتك، هتلاقى بعينك كذا لوحة مكتوب عليهم counters بيورولك ازاى تمشى لحد ماتوصل للرقم اللى انت عايزه، هتلاقى موظف قاعد وفوقيه شاشة عليها رقم رحلتك ومعاد طيارتك، هتخش عليه.
وده ياسيدى موظف من شركة الطيران اللى سيادك حجزت عن طريقها، مصر للطيران مثلا او اى خطوط تانية، هياخد منك الشنط الكبيرة ويسيبلك الشنطة الشخصية بس، ويديلك تذكرة اسمها الboarding pass وديه تشيلها فى عينيك لانك من غيرها مش هتطلع الطيارة، وبيديلك كمان كارت فاضى بتاخده منه وتخليه معاك هنحتاجه بعدين..
الاجراء التانى : موظف الجوازات وختم الباسبور
وده ظابط مسئول عن خروجك من المطار، لو انت عليك قضية او مش مطلع اذن الجيش او عندك اى مشكلة، او حتى هو شاكك فى منظرك، ليه الحق انه ميخلكش تعدى عادى جدا، وعادة مفيش ولا كلمة بتدور بينك وبينه غير انك بتقوله مساء الخير وغالبا مش هيرد عليك، هياخد منك الباسبور يشيّك عليه ويبص ف وشك ويختملك ختم الخروج من البلد وبس كدة..
آه، وهياخد منك الكارت اللى انت خدته من موظف الطيران بس بعد ماتملى فيه بياناتك طبعا..
عديت الجوازات؟
انبسط بقى!
هتلاقى السوق الحرة لو حبيت تعمل شوبينج، وممكن تقعد فى اللاونچ لو معاك كريدت كارد، وهتلاقى ممر الطيارات والطيارات راكنة تتصور معاها، وعيش بقى حياتك..
وبعدها تطلع على بوابة الخروج بتاعتك وديه موجودة فى التذكرة اللى ادهالك موظف الطيران وقولتلك شيلها جوا عينيك، وهتلاقى لوح كتيرة بتوصفلك ازاى تتحرك للبوابات gates ولازم تكون عند الgate بتاعتك قبل معاد الطيارة ب45 دقيقة عالاقل، اوعى تسرح والطيارة تروح عليك زى ماحصل مع واحد صاحبى اسمه عب شكور!
خلاص عرفت كل خطوات المطار، مفاضلش غير انك تسافر بقى!
وعشان تسافر محتاج تاخدلك بصة على جدول رحلاتنا اللى هتلاقيه فى قسم الرحلات، احنا متأكدين انك هتلاقى هناك حاجة هتعجبك.
كمان تقدر تشوف قسم الاوراق والتأشيرات وقسم الدليل الكامل اللى فيهم مقالات كتيرة جدا هتفيدك.
