استخراج جواز سفر هو دايمًا الخطوة الاولى لتحقيق حلم السفر برّا مصر..
لو انت مش عارف ايه هو اصلًا جواز السفر ده “اللى هو هو الباسبور” فـ احنا نحب نعرّفك ان جواز السفر ده هو ببساطة اثبات شخصية “زيّه زى بطاقتك كدة بالظبط” بس الفرق بينه وبين البطاقة هو ان جواز السفر مُعترف بيه دوليًا انما البطاقة لأ.
فلو انت ماشى فى اى بلد فى العالم او مسافر من اى مطار فى العالم وحد طلب منك اثبات شخصية بتقوم انت توريله باسبورك.
وعشان كدة لازم طول مانت مسافر اى بلد تفضل محافظ على الباسبور بتاعك وحاطّه جوّا عينيك عشان من غيره هتتسوّح وهتحصلّك مشاكل كتير.
طيب ايه البلاد اللى هقدر اسافرها بعد ماستخرج جواز السفر المصرى؟
بلاد كتير، يمكن اكتر من خمسين بلد!
باسبورنا المصرى بيسمحلنا بزيارة عدد كبير من البلاد بدون تأشيرة او بتأشيرة اونلاين.
وفى نفس الوقت بنواجه برضه صعوبة كبيرة لدخول دول تانية بالباسبور المصرى.
قوة اى باسبور بتتحدد على اساس عدد الدول اللى بتقدر تدخلها بالباسبور فقط!
يعنى لو انت ألمانى، ومعاك الجنسية الالمانية والباسبور الالمانى، فـ مبروك!
انت تقدر تسافر اكتر من 170 دولة حول العالم بباسبورك بس، بدون اى اوراق ولا اى تأشيرات!
فعشان كدة بنقول ان باسبورنا المصرى مش من الباسبورات الضعيفة، لأنه بيسمحلنا بزيارة اكتر من خمسين بلد حول العالم بمنتهى السهولة!
كدة عرفنا كل حاجة عن الباسبور والبلاد اللى هنقدر ندخلها بيه، ازاى بقى نستخرج جواز السفر ده؟
استخراج جواز السفر سهل جدًا وبسيط، هتجهّز مجموعة اوراق وتروح تقدّمهم فى مصلحة الجوازات اللى انت تابع ليها حسب عنوانك فى البطاقة، وبعد خمس ايام عمل ترجع هتلاقى باسبورك جاهز ومستنيك تاخده وتطلع عالمطار على طول!
الاوراق اللى تكون مجهّزها وتروح بيها مصلحة الجوازات :
1- اصل بطاقتك الشخصية وصورة منها، وده لو انت فوق 16 سنة ومعاك بطاقة.
اما لو انت تحت ال16 يبقى تاخد معاك شهادة ميلادك وصورة منها برضه.
2- مؤهلك الدراسى؛ وده بيبقى حالة من تلاتة :
– لو انت طالب فى المدرسة او فى الجامعة يبقى هتحتاج تطلّع ورقة من المدرسة او الجامعة اسمها اثبات قيد، روح شئون الطلبة هناك وقولّهم عايز اثبات قيد عشان اقدّم على باسبور، هيدّولك ورقة اثبات القيد تاخدها وتطلع عالجوازات.
– لو انت خرّيج جامعة بس ده مش مُثبت فى بطاقتك، ساعتها هتاخد معاك اصل شهادة تخرّجك وصورة منها
– لو انت خرّيج جامعة وده مُثبت فى بطاقتك يبقى ساعتها مش هتحتاج حاجة خالص غير البطاقة وصورة منها زى ماقولنا فوق.
3- استمارة نموذج 29 جوازات :
وديه هتلاقيها هناك ماتقلقش، هتاخدها من الشباك وتملى فيها بياناتك بحرص شديد، خد بالك وانت بتكتب اسمك بالانجليزى ان الـspelling بتاع الحروف يكون مظبوط، ولو ليك اخوات معاهم باسبور شوف اسم الاب والجدود هُم عاملين حروفهم ازاى واكتبها زيّهم.
4- 4 صور شخصية حديثة، مقاس 4*6 خلفية بيضاء “وانت بتتصوّر ابقى قول للراجل عايز الصور للباسبور، ويُفضّل تكون ودانك واضحة فيهم “لو شعرك طويل ميكونش مداريهم”
5- الموقف التجنيدى للذكور فوق سن 19
اى ولد فى مصر سنّه فوق ال19 سنة لازم هايبقى ليه موقف تجنيدى من تلاتة :
– اعفاء من الخدمة العسكرية “لو اخد اعفاء من الجيش”، وساعتها هتروح بشهادة الاعفاء بتاعتك.
– ادّى الخدمة العسكرية “لو دخل الجيش وخلّص خلاص”، وساعتها هتروح بشهادة اتمام الخدمة العسكرية اللى هتبقى معاك.
– تأجيل الخدمة العسكرية “لو لسه فى الجامعة مثلا وهيخش جيش بعد مايتخرّج” وساعتها هتاخد ورقة بتُفيد انك لسه وضع الخدمة العسكرية مؤجل بالنسبالك.
حسب حالتك من التلاتة هتقدم المستند، واللى هتقدّمه هيتكتبلك فى باسبورك.
6- إثبات الحالة الاجتماعية للإناث :
لو اسم الزوج مش مُثبت فى البطاقة يبقى هتحتاجى تقدّمى قسيمة الزواج وصورة منها.
7- لو انت شغّال فى شركة وعايز تثبت الوظيفة فى باسبورك يبقى هتجيب ورقة من الشركة ديه تثبت انك موظّف فيها وتقدّمها مع صورة منها، اما لو انت صاحب شغل خاص او تاجر او فاتح مشروع لنفسك، يبقى هتحتاج تقدّم اصل السجل التجارى وصورة منه.
8- هتدفع 1000 جنيه رسوم استخراج الباسبور لأول مرة.
هتقدّم الاوراق ديه وزى ماقولنا فوق، هتروح بعد فترة 5 ايام عمل كحد اقصى “4 ايام فى الطبيعى” وتستلم باسبورك جاهز انك تبدأ تملاه اختام، وفيه اوبشن اسمه جواز سفر مستعجل يطلع تانى يوم او بعد يومين ولى من العباسية هيكون فى نفس اليوم بس تروح الصبح وتستلمه اخر النهار..
الباسبور اللى هتستلمه ده هاتبقى صلاحيته 7 سنين، وبعد مالسبع سنين بيخلصوا بتقدّم على واحد جديد “ماينفعش تجدد القديم”، بتحتفظ بس بالقديم وتخليه معاك عشان الاختام اللى فيه تفضل معاك.
كدة انت معاك كل المعلومات اللى تخلّيك جاهز لأول خطوة فى سفرك برّا مصر، الباسبور ده هايسمحلك تسافر خمسين بلد واكتر بدون تأشيرة او بتأشيرة اونلاين..
انطلق واستكشف، وخلّيك فاكر ان السّر فى الرحلة والطريق مش فى الوجهة.
