اسكندرية – دليلك الكامل

“اسكندرية ليها القدرة دايمًا انها تبسطك” هى جُملتنا المُفضّلة عن اسكندرية، غير اننا بنعتبرها اكبر مطعم مفتوح على البحر الابيض المتوسط، فى المقالة ديه هنتكلم بسرعة وباختصار عن المواصلات، الاقامة، اشهر اماكن الفُسح والخروجات في اسكندرية، والاهم من ده كله: اشهر مطاعم فى اسكندرية وكل التفاصيل عنها، لو بتعمل دايت خد بالك لإن قراية المقالة ديه هتتعبك اوى

عشان تروح اسكندرية عندك الميكروباص من رمسيس، غالى ومش مُريح اوى ومش اكيد انه هيوصل لقلب اسكندرية، ممكن يبقى آخره الكيلو 21، اتأكد من السوّاق قبل ماتركب، عشان كدة القطر حل افضل وأريح، درجة تانية مُكيّف هيودّيك لحد محطة الرمل ونفس الوقت تقريبًا مش ابطأ، وتقدر تحجزه من قبلها بكذا يوم وتضمن انه هيتحرك فى معاده مش هتستناه ساعة يحمّل

اما المواصلات جوه اسكندرية ف الميكروباصات اللى عالكورنيش هى الاشهر، بس خد بالك من التوقيت لانك لو فى ساعة الذروة الكورنيش هايبقى واقف فى حتت كتير وساعتها هيضيع منك وقت كبير، فيه اوبشن تانى جميل ممكن تجرّبه هو الترمّاى، هتحس انه خدك لزمن مصر فالتسعينات كدة

بالنسبة بقى للاقامة ف طبعًا كل واحد وميزانيته، بس عموما خلّيك فالحاجات اللى قريبة من محطة الرمل وبلاش الناحية بتاعة خالد ابن الوليد، عشان اشهر المطاعم والخروجات والكافيهات موجوده ناحية محطة الرمل فبلاش تسحل نفسك

من ارخص الاماكن اللى ممكن تقعد فيها هو فندق بلو ريڤيرا، مكانه حلو وشايف البحر مالجنب

لكن لازم ننبّه ان مستواه متواضع جدًا جدًا، فلو انت متعوّد تقعد فالاماكن الغالية والاوتيلات الكبيرة يبقى مظنّش انك هترتاح هناك، اما لو بتحب الحاجات المتوسطة فالسعر والجودة زى حالاتى، يبقى ممكن تجرّب واحد من اكتر الاماكن اللى بنحب نقعد فيها فاسكندرية وهو فندق درويش، مستوى متوسط وعالبحر مباشرة

..نخش بقى عالخروجات والكافيهات

كوبرى ستانلى: روح ساعة الغروب، جو لطيف وصور جميلة وساعتين ممتعين جدًا، وكمان ممكن تكون جايب اكل وتقعد تتغدى هناك عالبحر، هتنبسط فعلًا

قلعة قايتباى: لو انت غاوى اثار وكدة روح خُدلك لفّة هناك، تذكرة دخول رخيصة وبالذات لو انت طالب، بس لااازم تروح من بدرى عشان تلحق تستفيد باليوم

مكتبة اسكندرية: سواء انت غاوى ثقافة وقراية او لأ كدة كدة لو رُحت هتنبسط لإن اجواء المكتبة مُسلّية جدًا، وبرضه لازم تروح من بدرى وكمان جرّب تشوف فيلم فالقُبة السماوية هتنبسط جدًا، وهتلاقى اسماء ومواعيد عرض الافلام عالموقع بتاعهم، وهتلاقيهم بيتغيّروا كل فترة

كازينو الشاطبى: ده مُجمّع كافيهات عالبحر على طول، غالى شوية بس القعدة فيه جميلة وهتحس انك جوه البحر

متاجر البن البرازيلى: احلى قهوة ممكن تشربها فى اسكندرية، وكمان هتبقى محظوظ لو لاقيتهم جايبين باند بيعزف فى الوقت اللى انت فيه هناك، فيه 3 محلّات بالاسم ده فى اسكندرية ويمكن اكتر، احنا بنرشّح اللى فى محطة الرمل عن تجربة

قهوة فاروق: واحدة من اجمل واقدم قهاوى اسكندرية، بيُقال ان اتصوّر هناك كذا فيلم من اشهرهم ملّاكى اسكندرية، جو القهوة حلو ويحببك فالقعدة بس هى مش عالبحر، غير ان كراسيها خشب قديمة ف متستناش منها الانتخة اللى موجودة فالكافيهات اللى عالبحر، 

هنجر المراكب: الحقيقة ديه مش خروجة اوى، ديه ورشة عالبحر لتصنيع وترميم المراكب، المكان مش مشهور خالص وغالبًا محدّش بيروحه غيرنا، بس هو فعلًا مريح والصور هناك جميلة، هتلاقيه على يمينك بعد القلعة وحلقة السمك وقبل الشيخ وفيق

قصر المنتزه: الناحية التانية خااالص من الكورنيش وده عيبه الوحيد انه بعيد، لكن هو مكان جميل هتقضى فيه وقت حلو عالبحر وهتتصور صور حلوة وهتفصل دماغك من الدوشة

كافيه وحلويات ديليس: نفسك ترجع فترة التمانينات فى مصر؟

زمن البشوات والهوانم وكدة؟

خُش اقعد فالمكان ده ساعتين، المكان ده الزمن لسه واقف جواه عند التمانينات متحرّكش

كل اللى ناقصه بس ان معاملة الستاف تبقى احسن شوية وهى هتبقى فل، والله هتبقى فل

محطة الرمل: ديه المنطقة اللى فيها عدد كبير من المطاعم والكافيهات، هتنبسط لما تتمشى هناك وسط العمارات القديمة، اللى هتفكّرك بوسط البلد فالقاهرة

كمان القعدة والتمشية عالبحر قصاد محطة الرمل بيبقوا رايقين وجُمال

: خلّصنا الخروجات، تعالوا ندخل سوا بقى عالجزء الامتع والاعلى سعرات حرارية فالمقالة، اشهر المطاعم فى اسكندرية

كبدة الفلّاح: مقدرش مبدئش بيه، ريقى جرى وانا بكتب اسمه دلوقتى، تخش تاكل عشر ساندوتشات بالفلفل والليمون بقى وادّيها

حتى لو انت مش بتحب الكبدة، برضه هتحب كبدة الفلّاح

مُسلم – ساندوتش بضمير: قررنا نحطّه تانى إسم مباشرة نظرًا لأنه مش معروف اوى ومش واخد حقّه

الساندوتش عنده طوله فى حدود 40 سم ومتعرفش تقفله من كتر الحشو

ساندوتش الجمبرى بالكابوريا المقلى هو طلبنا المُفضّل، وبرضه انواع ساندوتشات الفراخ عنده تستحق التجربة

ألبان سويسرا: غنى عن التعريف طبعًا، اوّل من دخّل فكرة طاسات الجبنة السايحة فيكى يامصر، فطار مثالى يخلّيك مش محتاج تتغدّى اصلًا، وماتنساش تطلب زيتون كلاماتا عشان حلو جدًا

محمد احمد: يعنى الفول والطعمية زى الكتاب مابيقول، وياسلام عالافتكاسات اللى عنده بقى، فول بالحمص، طعمية بدبس الرمّان، وحاجات تانية كتير

خد منه الساندوتشات واشترى بيبسى من اى سوبر ماركت واقعد افطر عالبحر، ومش هتعوز حاجة تانى مالدنيا

كرم الشام: سوريا وصلت اسكندرية ياجدعان!، من احلى مطاعم الاكل السورى فى اسكندرية، كميّة الاكل وطعمه حلوين جدًا مقارنة بالسعر، وكمان لو انتوا شلّة يبقى لازم تبصّوا على العروض عشان اكيد هتلاقوا عروض تناسبكوا وهتوفّروا كتير

فطاطرى دهب: كمّيات بقى، كميات بغباوة واسعار على قد ايدك

او تفكّر تتغاشم وتطلب كتير عشان جملة “عايزين الباقى تيك اواى” هى الحل اللى انت هتلجأله

اكلة سمك: وهنا بقى عندك كذا اختيار وكلّهم الحقيقة قريبين من بعض، سعر معقول وقعدة شعبية

..اولًا “هو ده شعبان بتاع السمك اللى بيقولوا عليه” اه والله هو اسمه كدة وده اللى مكتوب عاليافطة بتاعته

..ثانيًا “حودة جوندول” واختلفت الآراء هى المفروض جوندول ولا دونجول، ومستنيين مؤرخ اسكندرانى يكشفلنا الحقيقة ان شاء الله

ثالثًا “حلقة السمك” وديه هتلاقيها جنب القلعة على طول، بتروح تنقّى وتشترى السمك اللى يعجبك وتخلّى الراجل ينضفهولك وهاتلاقى هناك برضه ناس بتشوى وتجهّز، وتاخده وتقعد تاكل عالبحر بقى

احنا جرّبنا التلاتة والتلاتة ممتازين بصراحة وسعرهم فالمعقول بالنسبة لاسعار السمك فى القاهرة

..الشيخ وفيق: الحلو اقوله ياحلو فى عيونه

رز بلبن بالمكسرات، ام على، ايس كريم، اى حاجة من عنده حلوة، هتلاقى نفسك عايز تروحله بعد كل مطعم من اللى قولنا عليهم

كل الاماكن اللى فاتت ديه هاتلاقوا مكانها بسهولة جدًا على جوجل مابس، كُلّها قريبة من البحر وليها مواصلات سهلة او مشى حتت صغيرة

..كدة معاكوا برنامج يكفّيكوا اسبوع فى اسكندرية، روحوا هتنبسطوا، وشاركوا المقالة مع اصحابكم اللى ناويين تسافروا معاهم

“وخلّيك فاكر.. “اسكندرية قادرة جدًا انها تبسطك