فى الجزء اللى فات عرفنا كل حاجة تخص التأشيرة، فيه دول تأشيرتها صعبة جدًا، دول متوسطة فالصعوبة، ودول سهلة جدًا ويعتبر مالهاش تأشيرة يعنى.
الجزء ده هنتكلم عن اكتر حاجة ممكن تخلّى سفريتك رخيصة جدًا او غالية جدًا، وهى تذكرة الطيران.
تذكرة الطيران هىّ المحور التانى فى سفريّتك بعد التأشيرة، وغالبًا بتبقى العبء المادّى الاكبر فى اى سفرية، اكتر حاجة هتدفع فيها فلوس، فلو كنت شاطر وعرفت توفّر فالطيران ده هيخلّى ميزانية سفريّتك تقل جدًا.
بعد ماتحدد قايمة من البلاد اللى عاجباك، وبعدها تدخل تتأكد ان تأشيرتهم مناسبة لظروفك وهتعرف تاخدها، تقوم داخل على موقع skyscanner، اشهر موقع لعرض اسعار تذاكر الطيران، فيه مواقع تانية كمان مشابهة ليه، بس Skyscanner يعتبر الاكبر والاشهر.
الموقع ده يبان من برّا انه سهل، تحط المواعيد والتواريخ وتجيلك الاسعار وخلاص، بس فيه كذا trick لو عملتهم هيساعدوك توفّر جامد “إفتح سكاى سكانر دلوقتى فى tab تانية عشان تتابع الخطوات وتنفّذها”
اولًا لو انت مش مجبر على مواعيد معيّنة يبقى متحطّش يوم معيّن، هاتلاقى اوبشن وانت بتختار التاريخ انك تختار شهر كامل وهو هيجيبلك الايام اللى فيها السعر الارخص!
ثانيًا وانت بتختار المطارات، متحطّش مطار معيّن للسفر ومطار معيّن للوصول، لا اختار البلد كلّها، لأنك ممكن تلاقى طيران من الغردقة – مثلًا – للحتة اللى انت رايحها، ارخص الفين تلاتة تقريبًا من لو كنت هتتحرك من مطار القاهرة.
الفلوس ديه جيبك اولى بيها، ساعتها تحجز اتوبيس القاهرة غردقة وتوصل تقعد ساعتين فالغردقة تتمشى فالمارينا وتاكل اكلة محترمة وتقوم واخد تاكسى طالع عالمطار وتبقى وفّرت كتير وانبسطت اكتر، وهكذا برضه فى اختيار مطار الوصول فى البلد اللى انت رايحها.
ثالثًا خليك صبور واستنى اللُّقطة، الطيران اسعاره بتتغيّر بين ساعة والتانية، ممكن فجأة السعر يزيد او يقل، خش على سكاى سكانر مرة الصبح ومرة بالليل، خليك مراقب الاسعار ومتابع رينچاتها، عشان فى لحظة ممكن تظهر حاجة لُقطة فتكون جاهزلها، “وانا بكتب المقال ده لاقيت تذكرة طيران ذهاب وعودة من الغردقة لسويسرا ب 2250 جنيه مصرى!!”
رابعًا، الترانزيت الطويل مش وحش اوى طالما هيوفّر.
حد هنا بيقبض ألفين جنيه فاليوم؟
احتمال تلاقى ترانزيت يخليك تستنى عشر ساعات فى اى مطار فالعالم، بس سعر التذكرة يكون ارخص ألفين جنيه مثلًا، تستنى عشر ساعات تتفرج فيهم على فيلمين وتسمع مزّيكا وتدردش شوية مع الاجانب وتاكُل حاجة وتلف تتفرج عالمطار، وتوفّر ألفين جنيه!
مش deal وحش يعنى..
وياسلام لو ظبطت الترانزيت الطويل بتاعك فى بلد تأشيرتها سهلة وتنزل تقضى اليوم فيها وتبقى زُرت بلد جديدة.
كدة احنا قولنا ملحوظات كتير خليك فاكرهم كويس وانت بتسيرش.
طيب لو ربنا كرمك اخيرًا ولاقيت التذكرة المنشودة، تحجزها ازاى بقى؟
الموضوع سهل، هتدوس عليها فيجيبلك اسعار التذكرة ديه على مواقع حجز الطيران كلها، وده لأن سكاى سكانر مش موقع حجز طيران، لكن هو موقع بيعرض اسعار الطيارات فى جميع مواقع حجز الطيران.
فهتلاقى مواقع الطيران اسمائها تحت بعض قدامك، كل موقع فيه قدامه معلومتين فقط، سعر التذكرة وتقييم الموقع “كام نجمة من خمسة”
السعر مهم، بس التقييم اهم!
يعنى لو لاقيت ان الموقع اللى عارض ارخص سعر تقييمه تلاتة من خمسة يبقى بلاش منّه، لأنك ممكن تلاقى الموقع اللى تحتيه على طول سعر الرحلة فيه اغلى 100 جنيه بس تقييمه اربعة ونص من خمسة، ساعتها روح للموقع التانى، وبعدها تلاقى موقع تالت اغلى 500 جنيه بس خمس نجوم، ساعتها خليك فالموقع التانى برضه، 500 جنيه رقم كبير والاتنين مستواهم قريب من بعض.
يعنى ببساطة اعمل توازن بين السعر وتقييم الموقع.
هتحجز من الموقع عن طريق انك ببساطة هتسيب بيانات باسبورك وايميلك، وطبعًا خد بالك انك تحط بيانات الباسبور مظبوطة بالحرف وبالرقم، وبعدها تحط بيانات الكريدت كارد بتاعك، الفلوس هتتسحب والتذكرة هتجيلك عالايميل فى ساعتها، تروح لموقع شركة الطيران نفسها “مصر للطيران مثلًا” وتحط الرقم المرجعى اللى جالك فى تذكرتك فتلاقى اسمك موجود فتفرح وتزقطط، وتقوم طابع التذكرة اللى جاتلك عالايميل وشكرًا.
عشان كدة تقييم الموقع لازم يكون كويس، عشان ميكونش بيهنّج او معندوش خدمة عملاء كويسة لو احتاجت تعدّل اى حاجة.
وانت بتحجز التذكرة ماتنساش تبص على الوزن المسموح – مطار ومعاد المغادرة – مطار ومعاد الوصول – شروط وتكاليف تعديل المواعيد او إلغاء التذكرة.
عايز تريّح دماغك من كل ده وبتخاف تحط ارقام الكريدت بتاعتك عالنت؟
يبقى تحدد الرحلة اللى انت عايزها خلال سكاى سكانر وتاخدلها screenshoot وتنزل على اى مكتب سياحة وتقوله عايز احجز الرحلة ديه، بس ده هيكون اغلى شوية لكن هيطمنك اكتر.
احنا عارفين كويس ان ناس كتير بتقلّق من انها تحجز التذكرة اونلاين، انا اول مرتين اسافر فيهم خُفت احجز التذكرة اونلاين ونزلت حجزتها من شركات سياحة، بس بعد كدة قررت اجرّب بنفسى وفعلًا طلع الموضوع سهل وبسيط وموفّر.
اما بالنسبة للاقامة، ازاى تحجز الفندق الانسب؟
فيه مواقع كتير جدًا لحجز الفنادق على مستوى العالم، اشهرهم هو Booking.com
ببساطة بتدخل عليه وتحط اسم المدينة والايام اللى انت هتبقى موجود فيها هناك.
هتجيلك كل الفنادق والهوستيلز اللى فالمدينة.
لفظ هوستيل ده بيتكرر كتير وممكن حد ميكونش عارفه، الهوستيل ببساطة هو اوتيل بس صغير وبسيط ورخيص.
عادى فيه اوض برايڤت بحمام برايڤت، وبرضه فيه اوبشن انك تاخد سرير فى اوضة فيها 6 او 8 سراير ويكون معاك ناس كتير من جنسيات مختلفة، انت ومزاجك يعنى.
لو انت بتقرا الكلام ده وبتفكّر جدّيًا تاخد خطوة السفر لوحدك بعيد عن شركات السياحة، ف بنسبة كبيرة الهوستيل هيناسبك اكتر مالاوتيل، لأنه بجانب انه رخيص فهو بيديلك فرصة حلوة تتعرف عالاجانب اللى بيزوروا البلد فى نفس الوقت وهيساعدك تعمل صداقات معاهم وجايز تخرجوا تستكشفوا البلد سوا.
طيب ايه الحاجات اللى تراعيها وانت بتختار الهوستيل :
1- السعر، الهوستيل مكان للسهرة الصغيرة والنوم، مفيش داعى تصرف فيه كتير
2- التقييم، لازم تقرا آراء الناس عنه وتختار فندق تقييمه عالى، عشان ماتروحش هناك تتفاجئ بمعاملة وحشة او عدم نضافة او عدم آمان، هتلاقى بوكينج عارض تقييمات الناس لكل حاجة لوحدها، النضافة، الامان، الstaff، الاكل، والـlocation، وركّز ان تقييم الlocation يكون عالى
3- الموقع، خد حاجة قريبة من الاماكن اللى ناوى تزورها، يافرحتى بهوستيل رخيص بس بعيد عن كل حاجة، ف هاتبقى اللى وفرته فالفندق دفعته فالمواصلات غير انك هاتبقى خسرت وقتك ومجهودك.
4- نوع الغرفة، اتأكد انت بتحجز سرير فى اوضة مشتركة ولا غرفة خاصة بحمام مشترك ولا غرفة خاصة بحمام خاص، والسعر شامل الفطار ولا لأ، اقرا تفاصيل حجزك كويس
5- طريقة الدفع وشروط الالغاء، هاتلاقى اماكن كتير على بوكينج بتقدر تحجزها من غير ماتحط ارقام الكريدت بتاعتك، وتروح هناك تدفع على طول، خليك فى دول عشان لو حبيت تغيّر رأيك ماتبقاش اتدبست ودفعت فلوس.
معلومة مهمة : صاحب الهوستيل هو دايمًا صديق جدع وهينفعك جدًا جدًا لأنه ادرى واحد بمدينته، اتصاحب عليه لأنه هيساعدك جدًا فى انه يقولك حاجات زى المواصلات الداخلية جوّة المدينة، المطاعم الحلوة الرخيصة، كافيهات وسهرات رايقة، اماكن تجيب منها هدايا، مكان تغيير عملة او دراى كلين او صيدلية، صاحب الهوستيل مهم جدًا تتعرف عليه وراعى النقطة ديه وانت بتقرا آراء الناس فالهوستيل على بوكينج، انهم يكونوا بيشكّروا فالمالك.
راعيت الحاجات ديه كلّها، اضمنلك هوستيل رايق.
وكمان مش عايزين ننسى واحد من اهم مواقع حجز اماكن الاقامة هو airbnb، والفرق هنا انك هتأجر شقة او اوضة مباشرة من المالك، يعنى مش فندق او اوتيل.
وبرضه لو قررت تحجز عن طريق airbnb لازم تراعى كل الحاجات اللى قولنا عليها فوق.
الجزء الجاى هنحكى فيه عن ازاى تعمل برنامج كامل لنفسك بمزاجك وعلى ذوقك، من اختيار المُدن، للمواصلات، للخروجات والمزارات، لحد الاكل.
وطبعًا ازاى تحسب تكاليف كل ده.
تقدروا تقروا الجزء التالت والاخير على موقعنا..
