عرفنا فالاجزاء اللى فاتت اول محورين لترتيب اى سفرية عايز تسافرها لوحدك.
المحور الاول هو الڤيزا، والدول اللى ممكن تجيلك ڤيزتها من وانت فالبيت.
والمحور التانى هو الطيران والاقامة، والحاجات البسيطة اللى لو راعيتها هتقدر تحجز طيارة سعرها رخيص جدًا وفنادق مناسبة ليك.
نيجى بقى للمحور التالت، خلاص اختارنا دولة وطلّعنا تأشيرتها وحجزنا تذاكر طيارنها وفنادقها، ازاى بقى نرتّب تفاصيل الوقت اللى هقضيه هناك؟
جوجل عامًة وجوجل مابس خصوصًا هو من اهم الحاجات اللى هتساعدك فالسفرية.
اول حاجة تتعرّف عليها فالبلد هىّ المُدن السياحية اللى فيها، تخيّل معايا انك مثلًا نفسك تسافر ايطاليا، افتح tab تانية دلوقتى وابدأ جرّب الخطوات ديه، لو عملت كدة فأنا بوعدك – من غير ما اعرف انت مين – انك اكيد هتسافر الدولة ديه فيوم من الايام.
خلّى السيرش بالانجليزى حتى لو انت مش شاطر فيه اوى، وده لأن الاجانب بيكتبوا المقالات بشكل افضل فهتلاقى نتايج احسن.
سيرش عن : Top cities in Italy
خش على اول لينك، هاتلاقى واحد مرشّح خمس مُدن، اكتبهم فى ورقة.
ارجع وخش على تانى لينك، هاتلاقى مثلًا واحد مرشّح 6 مدن منهم اربعة كانوا فالمقالة اللى قبلها واتنين جُداد، زوّد الاتنين الجداد فالورقة.
خش على تالت لينك، هاتلاقى واحدة جديدة زوّدها.
وهكذا لحد ماتعرف مثلًا اشهر 8 مدن فى ايطاليا
وتبقى ديه اول خطوة.
تدخل بقى عالخطوة اللى بعدها، هتختار انهى مدن من التمانية دول عشان تروحهم.
ببساطة تمسك اسم اول مدينة ولتكن روما، وتخش عاليوتيوب او على جوجل حسب انت فاتح باقة ولا واى فاى، وتكتب What to do in Rome او hidden gems in Rome
اكتبها بنفس الطريقة ديه، هاتلاقى بقى مقالات كتير جدًا واضحة وبسيطة وبالصور والڤيديوهات، بتوضّح ايه اللى ممكن يتعمل فى روما
ابدأ اقرا، وشوف الصور، وشوف هل انت حابب تعمل الحاجات ديه وتتصوّر صور زى ديه ولا لأ، لو عجبتك المدينة والانشطة اللى فيها يبقى خلاص المدينة ديه كدة معانا وش.
كرر عملية السيرش البسيطة ديه فى كل المدن اللى معاك، وبكدة هتبقى حددت مثلًا خمس مُدن همّ اللى عجبوك وانت خلاص قررت انك هتروحهم.
ندخل عالخطوة اللى بعد كدة، هيبقى ايه ترتيب المدن ديه وهتزور انهى قبل انهى.
هنا بقى تدخل على جوجل مابس – جوجل للخرايط، وتفتح خريطة ايطاليا – وتبدأ تحط اسم كل مدينة مالخمسة اللى عجبوك، هيطلعلك مكان كل مدينة عالخريطة، فتبدأ تشوف ايه منهم جنب بعض عشان تروحه سوا، فتعمل لنفسك مسار محدد تعدّى فيه على كل المُدن اللى عجبتك بالترتيب، وطبعًا لو مطار وصولك لايطاليا هو نفس مطار مغادرتك منها يبقى المسار بتاعك ده هايبقى دايرة،
لو انت تايه عالخريطة ومش عارف راسك من رجلك كدة هتدبّس فى مشاوير كتير عالفاضى، هتخسر خلالهم وقت وفلوس ومجهود.
حددنا المدن، وحددنا ترتيبهم، طيب هنتحرّك ما بينهم ازاى؟
بمنتهى السهولة عندك موقع rome2rio وعندك جوجل مابس برضه، بيورّوك كل انواع المواصلات المتاحة بين اى مدينتين فالعالم، بالاسعار والمواعيد.
او برضه ممكن تكتب على جوجل How to go from Rome to Milan وهتجيلك كل المعلومات اللى ممكن تحتاجها.
طب السؤال دلوقتى، هتقعد كام يوم فى كل مدينة؟
يعنى لو انت اجازتك مثلًا اسبوعين، ازاى تقسّمهم بين المدن كلها بحيث تاخد وقت كفاية فى كل مدينة.
ديه بقى بسيطة وانت اصلًا خلاص عملتها من شوية من غير ماتاخد بالك.
فاكرين لما كتبنا على جوجل what to do in Rome؟
ساعتها جاتلنا كل الاماكن والانشطة اللى ممكن تتعمل فى روما، وساعتها انت شوفت كل اماكن الخروج والحاجات اللى تتعمل فى روما.
امسك كل مدينة وقدّر كدة ببساطة ممكن تحتاج كام يوم عشان تخلّص كل الحاجات اللى عجبتك..
حسب عدد الانشطة اللى عجبتك فى كل مدينة هتحدد المدينة تستاهل كام يوم.
وماتنساش تعمل save location لكل الاماكن اللى قررت انك هتزورها فى كل مدينة، سواء جبل، متحف، شلّال، شارع او ميدان مشهور، عشان تبقى طول الوقت وانت بتتحرك فالمدينة عارف انت فين، وكمان عشان لو فيه مكانين قريبين من بعض تقدر تروحهم فى نفس اليوم وتبقى وفّرت وقت ومجهود وفلوس.
كدة انت عرفت كل ما يخص المدن، ترتيبهم، كام يوم فى كل مدينة، ازاى هتعمل البرنامج وازاى هتنتقل بين المدن وبعض.
يعنى عملت البرنامج بتاعك بالكامل، وزيادة تأكيد سيرش على جوجل بـ best itinerary for italy 10 days لو هتقعد فى ايطاليا عشر ايام مثلا، وشوف الناس اللى سافرت قبل كدة عملت خطتها ازاى، وكمان نزّل ابليكيشن Visit a city اللى هيساعدك جدًا تتعرف على كل مدينة.
كدة مش ناقصك غير حاجة واحدة بس وتقوم تجهّز شنطتك : حساب تكاليف السفرية
آخر حاجة واسهل حاجة هى حساب تكاليف السفرية، خد بقى الزيتونة من الآخر..
تكاليف اى سفرية هتتقسم جزئين، جزء هتدفعه هنا فى مصر، واللى هو التأشيرة وتذكرة الطيران، ودول هتحسبهم بالمصرى بمنتهى السهولة زى ماعرفنا فالجزئين اللى فاتوا.
اما الجزء التانى فهو هتحتاج كام فالبلد اللى انت رايحها..
وأول مايجى تفكّر فالجزء ده هننسى الجنيه المصرى خالص ونبدأ نفكّر بالدولار، لان انت هتسافر بدولار وتحوّله هناك لعملة البلد اللى انت رايحها ايًا كانت ايه هى..
هتسيرش عن كل حاجة من دول وتشوف سعرها بالدولار :
1- الاقامة
سعر الاماكن اللى هتحجزها بيبقى موجود على بوكينج واحيانًا بيبقى فيه ضريبة ماتنساش تبقى تضيفها
2- الاكل
وده تقدر تحسبه عن طريق موقع اسمه Numbeo وده بيجيبلك متوسط اسعار الوجبات فى اى مدينة فالعالم
3- المواصلات
سواء اللى جوه كل مدينة او اللى بين مدينة والتانية، وديه برضه موجودة على جوجل بسهولة او موقع المواصلات الشهير Rome2rio
4- الخروجات والسهرات وتذاكر دخول المعالم
اى مكان هتقرر تروحه شوفليه تذكرة دخول ولا لأ، ولو ليه ف سعرها هيبقى كام.
بعد الاربع حاجات دول ماتنساش تزوّد مبلغ للهدايا والسوڤونيرز حسب حُبّك لإصحابك، وزوّد كمان مبلغ بسيط يبقى معاك احتياطى للطوارئ.
كدة طلعلك المبلغ بالدولار، روح البنك بتاعك هنا فى مصر اشترى دولارات، وأول ماتوصل وجهتك بالسلامة ابقى حوّل من دولار لعملة البلد.
خد الكام تفصيلة دول :
-ماتنساش اول ماتنزل المطار تشترى شريحة موبايل وتحط نت عليها، هتساعدك اوى.
-اقرا معلومات سريعة عن اللغة، الديانة، العادات، الحاجات المشهورة عن البلد اللى انت رايحها، التفاصيل ديه هتخلّى سفريّتك امتع بكتير.
-خلّى شنطتك خفيفة على قد ماتقدر.
-اقرا عن قوانين البلد اللى انت رايحها عشان ماتلبسش فأى حاجة.
-جمّد قلبك قوم ماتخفش، تقدر عالعالم ومافيه.
اخيرًا..
السفر شيء ممتع، اوى، جدًا، والسفر لوحدك ليه متعة خاصة، هتكتشف حاجات جديدة مكنتش تعرفها عن نفسك، سواء حلوة او وحشة، وصدقنى هتتفاجئ بالحاجات ديه، وعمرك ماهترجع زى ماسافرت ابدًا
السّر فى متعة السفر هو انك هتشوف حاجات مختلفة، فدماغك هتوسع وفكرك هيبدأ يستوعب حاجات مكنش يعرفها، وتبدأ تتقبل اى حاجة مختلفة بهدوء وبدون عنصرية او استغراب.
احنا كـ Travellers4 بنرتب سفريات كتير مع جروبات كبيرة، سواء جوه مصر او برا، وفى نفس الوقت دايمًا احنا فى ضهر اى حد نفسه يرتب سفريته لوحده، بنقدم كل المعلومات والمساعدة اللى نقدر عليها لأى حد عايز يسافر اى حتة..
ابدأوا فالاجراءات وحققوا احلامكم، ولو احتاجتم اى مساعدة فى اى وقت ابعتولنا عالايميل او اتصلوا بينا واحنا هنرُد ونساعد فى اسرع وقت.
يلّا ولا إيه؟❤️
